كاركرنا ئافره‌تان ل پارێزگه‌ها دهۆكێ‌ د زێده‌بونێ‌ یه‌

كاركرنا ئافره‌تان ل پارێزگه‌ها دهۆكێ‌ د زێده‌بونێ‌ یه‌

13

دهۆك، نه‌وزاد هلۆری:

كاركرن بۆ هه‌ر كه‌سه‌كێ‌ گرنگیا خوه‌ هه‌یه‌، ئافره‌ت ژی مینا هه‌ر تاكه‌كێ‌ جڤاكی دشێت ببیته‌ خودان كار و خزمه‌تا جڤاك و خێزانا خوه‌ بكه‌ت و ببیته‌ خودان ئابوره‌كا سه‌ربخوه‌، خودانكاره‌ك ژی دبێژیت: هندی بشێم دێ‌ ئافره‌تان ده‌مه‌ كاری.

شه‌رمین، ژنه‌كا دهۆكێ‌ یه‌ و سه‌نته‌ره‌كێ‌ تایبه‌ت ب خولێن هاڤینێ‌ ڤه‌كریه‌ و هژماره‌كا كچ و كوران وه‌كو ماموستا ل ده‌ڤ خوه‌ دده‌ته‌ كاری و دبێژیت: (زۆر ژ مێژه‌ هزر لده‌ڤ من هه‌بویه‌ كو ببمه‌ خودان كاره‌كێ‌ سه‌ربخوه‌ و ل گه‌ل خوه‌ ژی چه‌ند كه‌سان بده‌مه‌ كاری، سوپاس بۆ خودێ‌ شیاین سه‌نته‌ره‌كێ‌ تایبه‌ت ب په‌روه‌رده‌ و فێركرنا قوتابیان ب رێیا خولێن جودا ڤه‌كه‌ین، د نوكه‌ دا هژماره‌كا زۆر یا ده‌رچویێن زانكویێ‌ ئه‌وێن نه‌هاتینه‌ دامه‌زراندن ل ده‌ڤ من كار دكه‌ن ب تایبه‌تی ئافره‌ت، ژ به‌ركو گرنگه‌ ئافره‌ت ژی مینا زه‌لامی ببیته‌ خودان كار و ئابورێ‌ تایبه‌ت بخوڤه‌ و خزمه‌تا خێزان و جڤاكێ‌ خوه‌ بكه‌ت و خودان شیانه‌ و دڤێت بوارێ‌ كاری زێده‌تر ژی ل به‌ر سینگێ‌ وان بهێته‌ به‌رفره‌ه كرن داكو بشێن رولێ‌ خوه‌ بینن).

شه‌رمینێ‌ زێده‌تر گۆت: (د نوكه‌ دا ل گوره‌ی ده‌می هژمارا وان كه‌سێن ل ده‌ڤ من كار دكه‌ن دهێته‌ گوهورین، به‌لێ‌ ب گشتی دناڤبه‌را 10 بۆ 50 كه‌سا ل ده‌ڤ من وه‌كو ماموستا كار دكه‌ن د پلانا من دایه‌ پتر ژی بده‌مه‌ كاری ب تایبه‌تی ئافره‌تان، دڤێت كچ و كورێن مه‌ ب تایبه‌تی ئه‌وێن ل زانكویێ‌ ده‌رچویی دووڤچون و لێگه‌ریانێ‌ بكه‌ن و ببنه‌ خودانكار چ ل كه‌رتێ‌ حكومی بیت یان ژی یێ‌ تایبه‌ت).

ئیمان عه‌بدولره‌زاق كو ب هه‌ڤكاریا هه‌ڤاله‌كا خوه‌ یا كچ كومپانیه‌ك ل دهوكێ‌ دانایه‌ ئه‌و دبێژیت: (كاركرن بۆ هه‌ر تاكه‌كێ‌ جڤاكی گرنگیه‌كا زۆر هه‌یه‌، پشتی ئه‌ز ل زانكویێ‌ ده‌رچویم من و هه‌ڤالا خوه‌ هزر كر كو كاره‌كێ‌ ل گوره‌ی بسپوریا خوه‌ بكه‌ین، ل داویێ‌ شیاین كومپانیه‌كا بچووك ل سه‌ر به‌رهه‌مئینانا كاره‌بێ‌ ب تیشكا رۆژێ‌ دروست بكه‌ین، نوكه‌ ئه‌م كه‌فتینه‌ سه‌ر كاری و چه‌ند كه‌س ژی ل گه‌ل مه‌ كار دكه‌ن، سوپاس بۆ خودێ‌ كار باشه‌ و د پلانێن مه‌دایه‌ كو كارێ‌ خوه‌ به‌رفره‌ه بكه‌ین و زێده‌تر خه‌لكی بینینه‌ ناڤا كاری).

جیهاد موسته‌فا، ماموستایه‌ ل سه‌ر گرنگیا هه‌بوونا كاری بۆ هه‌ردوو ره‌گه‌زان ب تایبه‌تی ئافره‌تان گۆت: (كار ئێكه‌ ژ وان باشترین كار و ره‌فتارێن پێشڤه‌برنا گه‌ل و وه‌لاتی و هه‌ر كه‌سێ‌ شیان هه‌بن دڤێت ببیته‌ خودان كار و خزمه‌تێ‌ بكه‌ت و پشكداریێ‌ د ئاڤه‌دانكرنا وه‌لاتێ‌ خوه‌ دا بكه‌ت، ئه‌و بخوه‌ ژی پشتبه‌ستنێ‌ ب شیانێن خوه‌ بكه‌ت بۆ ب ده‌ستڤه‌ئینانا داهاتێ‌ ژیانێ‌، له‌وا ب هه‌ر رێیه‌كا هه‌بیت دڤێت ئالیێن شوله‌ژێ‌ چ ل سه‌ر ئاستێ‌ حكومی بیت یان ژی كه‌رتێ‌ تایبه‌تی بواری ل هه‌مبه‌ر تاكێن جڤاكی ب تایبه‌تی ده‌رچویێن زانكو و په‌یمانگه‌ه و ناڤه‌ندێن پیشه‌یی ڤه‌كه‌ت داكو بشێن ل گوره‌ی بسپوری و شیانێن خوه‌ خزمه‌تا وه‌لات و خێزانێن خوه‌ بكه‌ن).

جیهاد زێده‌تر گۆت: (كاركرن بۆ هه‌موویان گرنگه‌ چ ئافره‌ت بیت یان زه‌لام، هه‌رچه‌نده‌ د جڤاكێ‌ مه‌دا زه‌لام پتر كار دكه‌ن، ژبه‌ركو به‌رپرسیاره‌تیا ب رێڤه‌برن و خودانكرنا خێزانێ‌ د ستویێ‌ واندایه‌، به‌لێ‌ زۆر گرنگه‌ ئافره‌ت ژی كار بكه‌ت و ببیته‌ خودان كار، ژبه‌ركو چو جوداهی نینه‌ د خودانكرنا خێزانێ‌ دا، له‌وا ئافره‌ت ژی گرنگه‌ بهێته‌ ناڤا كاری و خوه‌ پێ‌ بگه‌هینیت و ژ روویێ‌ زانستی خوه‌ پێ‌ بگه‌هینیت و دووڤچون و لێگه‌ریانێ‌ ل كاری بكه‌ت، سوپاس بۆ خودێ‌ ل ڤان سالێن دووماهیێ‌ بوارێ‌ كاركرنێ‌ بۆ ئافره‌تان به‌رفره‌ه بویه‌ و نوكه‌ د هه‌موو بیاڤان دا ئافره‌ت كار دكه‌ت).

کۆمێنتا تە