كار بۆ پێشڤەبرنا كەرتێ گەشتیاری و پاراستنا ژینگەهێ ل پارێزگەها دهۆكێ دهێتە كرن
دهۆك، دلۆڤان ئاكرەیی:
رێڤەبەرێ گشتیێ گەشتوگوزارێ ل پارێزگەها دهۆكێ دیاركر، سروشتێ جوان و سەرسوڕهێنەرێ كوردستانێ ب گشتی، ل گەل وان پڕۆژەیێن گەشتیاری یێن ل سنۆرێ پارێزگەهێ هاتینە ئەنجامدان، بووینە پالدەرەكێ بهێز، كو سالانە هەژمارەكا مەزنا گەشتیاران قەستا دەڤەرێ بكەن.
سەركار سەبغەتوللا، رێڤەبەرێ گشتیێ گەشتوگوزارێ ل پارێزگەها دهۆكێ بۆ رۆژنامەیا ئەڤرۆ گۆت: «مە دەست ب بەرهەڤكرنا هندەك نامیلكە و بەلاڤۆكێن تایبەت كرییە، كو تێدا پێزانین ل سەر جهێن گەشتیاری یێن ل سنۆرێ پارێزگەها دهۆكێ هاتینە بەرهەڤكرن، ئەڤ نامیلكە دێ ل سەر گەشتیاران هێنە بەلاڤكرن، ب تایبەت بۆ وان كەسێن ژ دەرڤەی پارێزگەهێ دهێن، دا كو پتر رێنمایی و زانیاریان ل سەر دەڤەرێ و پاراستنا وێ بزانن».
گۆت ژی: «ل دویڤ وێ راگەهاندنا ژ لایێ وەزارەتا ناڤخۆ و رێڤەبەریا هاتنوچوونێ ڤە هاتیە بەلاڤكرن، دێ سزا ل سەر وان كەسان هێنە سەپاندن یێن دبنە ئەگەرێ پیسكرنا ژینگەهێ و ژبۆ ڤێ مەرەمێ ژی، ئەم دێ كۆمبوونەكێ ئەنجام دەین، پلانێن گونجای دانین بۆ پێشڤەبرن و پاراستنا ژینگەهێ و كەرتێ گەشتیاری ل دەڤەرێ».
