كانتونێن رۆژئاڤا دێ بنه ئێك و سه‌رپه‌رشیته‌كا هه‌ڤپشك دێ هه‌بیت
ئه‌ڤرۆ نیوز: ڤه‌گێر
ژێده‌ره‌كێ ناڤ شاندێ دانوستاندنكارێ پارتێن سیاسى یێن رۆژئاڤاهیێ كوردستانێ ل دهۆك دیاركر، كو هه‌تا نوكه ل سه‌ر چه‌ند خالان یێن رێكه‌فتین و ژ وان ژى كانتۆن هه‌موو دێ بنه ئێك و سه‌رپه‌رشتیه‌كا هه‌ڤپشك دێ بۆ هێته دانان. ئه‌ڤى ژێده‌رى گۆت: “خالا ئێكێ به‌لگه‌ناما گرێدانا جڤاكى بهێته راستڤه‌كرن، ئه‌ڤ به‌لگه‌نامه په‌یه‌دێ چێكربوو بۆ ب رێڤه‌برنا كانتۆنێن رۆژئاڤا كورستانێ”.
ل دۆر خالا دویێ ژى گۆت: “رێڤه‌به‌ریه‌ك دێ بۆ هه‌موو ده‌ڤه‌رێن كوردێ هێته پێكئینان و سیسته‌مێ كانتۆنان دێ هێته گوهاڕتن، هه‌موو دێ بنه ئێك و ل ژێر سه‌رپه‌رشتیه‌كا هه‌ڤپشك”.
دا زانین كو خالا سیێ ژى ئاڤاكرنا هه‌ڤپشكیه‌كا راسته‌قینه‌یه د ناڤبه‌را هه‌ردو جڤاتان دا. ئه‌ڤى ژێده‌رى ل دۆر خالا چارێ ژى گۆت: “بۆپێكئینانا مه‌رجه‌عیه‌ته‌كێ كو 40% ژ جڤاتا نشتیمانى بیت و40% ته‌ڤده‌مێ و 20% هێشتا نه‌هاتیه دیاركرن دێ چاوان بیت”. ل دووماهیێ ژى گۆت: “نوكه هه‌ردو لایه‌ن چووینه د كۆمبوونێ دا و دێ ل سه‌ر بابه‌تێن سیاسى دانوستاندنێ كه‌ن”.
