كانتۆن یان پارچه‌كرن
ل مه‌ها ته‌باخا سالا 2014 ده‌ڤه‌رێن باشوورێ كوردستانێ تووشی هێرشه‌كا هۆڤانه یا تیرۆرستێن داعش بوون، هنده‌ك ژ وان ده‌ڤه‌ران كه‌فته ل بن ده‌ستێ چه‌كدارێن داعش، د ئه‌نجامدا چه‌كدارێن داعشێ چه‌ند تاوانێن هۆڤانه ئه‌نجامدان، هه‌ر ژ كوشتن و گرتن و ده‌سته‌سه‌ركرنا ژن و زارۆیان. . هتد.
ژ وی ده‌می وه‌ره سه‌ركردایه‌تیا سیاسی ل باشوورێ كوردستانێ و نه‌مازه سه‌رۆك مه‌سعوود بارزانی سه‌رۆكێ هه‌رێما كوردستانێ ب رێیێن دیپلۆماسی شیا ده‌نگێ خه‌لكی بگه‌هینن، وه‌لاتێن زلهێز و ب رێیا ئاسمانی دربان داوه‌شینن تیرۆرستێن داعش، ل سه‌ر ئه‌ردی ژی هێزا پێشمه‌رگێ كوردستانێ و شیان دربێن مه‌زن ل تیرۆرستان بده‌ن، هه‌تا كو نوكه پێشمه‌رگه بوویه ناڤه‌كێ جیهانی.
ب مخابنی ڤه هنده‌ك كه‌س و لایه‌نان، ئه‌ڤ كاودانه بۆ خوه ب ده‌رفه‌ت دیتن و هه‌ر چ ژه‌هره دارشته ل سه‌ر ده‌ستهه‌لاتا سیاسی ل باشوورێ كوردستانێ، هند پۆختانین بێ بنه‌ما بۆ دروستكرن، لێ خه‌لكێ كوردستانێ ژ ڤان گوتگوتكان مه‌زنتر بوو، له‌وما سه‌رتیرا وان ب به‌ری كه‌فت و نه‌گه‌هشتنه چ ئه‌نجامان.
پشتی ژ هندێ بێ هیڤی بووین، ئێدی دڤێت ب پلانێن دی ئاریشان دروست بكه‌ن، ئێك ژ وان وانژی دروستكرنا كانتۆنا شنگالێ یه، كاره‌كێ نه لۆژیكه ل ڤان ده‌لیڤان ئه‌ڤ پرسه بێنه گه‌نگه‌شه‌كرن، چونكی ل باشوورێ كوردستانێ و عیراقێ به‌رده‌وام هه‌لبژارتن دهێنه‌كرن، ئه‌و كه‌س و لایه‌نین بڤیت ده‌سته‌لاتێ وه‌رگرن و یان وه‌سا هزر دكه‌ن بیروباوه‌رێن وان باشترین بیروكه‌نه، دشێن ل هه‌لبژارتنان به‌رنامێ خوه پێشكێشی خه‌لكی بكه‌ن، نه‌كو دووڤه‌لانكیێ بۆ كه‌سێن دی ل ده‌رڤه بكه‌ن و ئه‌جیندێن وان بجهـ بینن.
دروستكرنا كانتۆنا نه ژ لایێ خه‌لكێ شنگال، نه خه‌لكێ كوردستانێ، نه بنه‌مایێن نێڤده‌وله‌تی، لۆژیكی نینه، چونكی ئارمانجا مه‌زن نوكه رزگاركرنا شنگال و قورتالكرنا وان كچ و ژنێن ناڤ ده‌ستێ داعش و تولڤه‌كرنا وانه.
براده‌رێن كانتۆن چێكرین به‌رده‌وام دبێژن مه پشته‌ڤانیا ناڤخوه و ده‌رڤه هه‌یه، لێ سه‌یره هه‌تا نوكه نه لایه‌نه‌كێ دیار ل ناڤخوه و نه ده‌رڤه پشته‌ڤانی بۆ دیار نه‌كریه، هه‌می ل گه‌ل هندێ نه كو كاره‌ك نه‌گونجایه ژ روویێ جوگرافی و نه‌ته‌وه‌یی و سیاسی و ته‌نانه‌ت جڤاكی ژی.
به‌لكو هه‌ولدانه‌كه بۆ پارچه‌كرنا باشوورێ كوردستانێ، ده‌مێ ڤان هزران ی ب سه‌رڤه چوویه، چونكی نوكه كورد ژماره‌ك مه‌زنن ل جیهانێ، یێ به‌رگریێ ژ هه‌می مرۆڤایه‌تیێ دكه‌ن، ئه‌ڤجا چاوا دێ رازی بن، ژنوو ڤه بێنه پارچه‌كرن.
