كاوە تو هاتی .. من زانی دێ هێی
ئازاد مستەفا
«دیاری بۆ روحا جانەمەرگ كاوە زوهێر ئاكرەیی»
سپێدەیەكا زوی .. خۆناڤەكێ، بێهنێن ئەنتیكە ژێك جودا دكرن و بەلاڤ نەدكرن.. بۆ هەر بێهنەكێ، جۆرە گولەكێ خۆ دچەماند و ب مەلویلی بشكوژكێن خۆ ژی سەرنشیڤ دكرن.. چێكەرێن گولاڤان ژی دلۆپەك ژ وێ خۆناڤێ ب دەست نەدكەڤت، گەلەك دكەسەرداربوون.. پەلاتینك هار و دین ببوون و ژ نیشتمانێ خۆ بێزارببوون و دهزرا مشەختبوونێ دابوون.. پرسیار، شاشمی، دبێ سەروبەر و ئازریایی بوون.. بەرسڤ دئۆبالییا خۆ دا مرار و دبێ ئاگەهبوون.. رۆژ رۆژا قیژی و هەواران بوو.. ئەو چەند زیانداربوون، گەلەك تیژبوون، قەبخواز و شەڕكەربوون.. هەمی ئەزمان ژ ئاخڤتنێ لال و وەرپێچایی بوون.. رۆندك د چاڤان دا ئازار ددان و دخەندقاندن.. دل و هناڤ ..بەرهەللا كربوون، جار دهەرشاندن، پرچقاندن، جار ژی دخوینا خۆدا دگەڤزاندن، ب ئاگرەكێ نە یێ نەرم و هێدی، یێ هار و گەرم، برژاندن و پاشی دسۆتاندن.. ئەو پرسیار هەر ل جهێ خۆ مابوون.. دەم و دیمەن.. دبێ وژدانبوون، ببوونە لێبووك و یاری ب مرۆڤایەتیێ دكرن، هەمی بەرسڤ بۆ مرنێ هێلابوون، مرنێ ژی سەنگ و بهایێ خۆ د راستیێ دا نخروو كربوو.. روح.. بێ چەنگ و پەر، دفڕینێ دا بوو، بێ خاترخواستن دبشكورینێ دا بوو، من دەستێن خۆ بۆ درێژكرن، بلند و بلندكرن.. خۆناڤەك ب دەستێن منڤە مینا هلمەكێ، هێدی و ب جوانی هاتە خوار، بێهنەك ژێ هات و هەمی بێهنێن دونیایێ رەزیل و شەرمزاركرن.. ئاخ ئەو چ بوو، بەرسڤ هات و گۆت: ئەو خۆناڤا دێمێ (كاوە)ی بوو، هەر زوی من ب سەر و چاڤێن خۆ ڤەدا، گول ب بشكوژڤە.. ڤەبوون و من خەملداركرن، چێكەرێن گولاڤان.. تەقاندن و من بێ بازاركرن، پەلاتینك.. من زڤراندن و بێ بەهر نەكرن، پرسیار و بەرسڤ.. من رازیكرن و هەڤچووت كرن، هەوار و قیژی.. من رسوا و شەرمزار و تاوانباركرن.. دەم و دیمەن، من گوهارتن و كرێت و بێ چارەكرن، روح و گەردەن ژی، من ئازا و سەربەست و ماچبارانكرن.. بێهنا خۆناڤا دێمێ وی ژی بۆ من ماڤە، هەتا ب وێ دیدارا وی یا ئەبەدی شاد ببم و بێژمێ (كاوە) تۆ هاتی.. من زانی دێ هێی.!
