كـاریگەریا وێنەكـرنا رویدانـان ل سەر جڤـاكـێ
بـەهـزاد بـەهرام
یا رەوایە كو ئەڤ جیهانا مرۆڤ تێدا دژین، یا پڕە ژ رویدانان، ئەڤجا چ رویدانێن سروشتی بن یان ژی رویدانێن دەستكرد، هەر تاكەك هندی خوە ب شێوەیەكێ گشتی بەهر د خوەشی و نەخوەشیێن ڤێ ژیانێ هەنە ب تایبەت رویدان و كارەساتێن دلتەزین و نەچاڤەرێكری، ئەڤجا هەر دەما رویدانەك ب سەرێ تاكەكی یان كۆمەكا تاكێن جڤاكێ كوردی هات، ئێكسەر ئەم دبینین ئەڤ كولتوورێ وێنەكرنا ڤێ رویدانێ د سۆشیال مەدیایێ دا دكەڤیتە بەرچاڤێن تەخێن جڤاكێ، كارتێكرنەكا نەرێنی و زیانبەخش ب شێوەیەكێ گشتی ل سەر جڤاكێ ب تایبەتی ل سەر وێ خێزانا رویدان ب سەری هاتی رەنگڤەددەت ژ هەمی لایان ڤە و پاشماوێن رویدانێ بۆ دەمەكێ زۆر درێژ و بۆ چەندین سالان ڤەدمینن. ئەگەر پرسەكا گەوهەری و بابەتی بئازرینین تا چ ئاست خوەشی د وێنەكرنا ڤان جۆرە رویدانان دا هەیە، ئەو تاكێ ب ڤی كاری رادبیت تا چ رادە یێ هشمەند و دووربینە؟ بێ گومان ژبلی ئازاردان، تێكچوونا بارێ دەروونی و هەلچوونێ نەئاسایی و بلند یێ چەندین كەسان تایبەت تەخا زارۆك و كەس و كارێن خوەدی رویدانێ، دیسا ب چ پیڤەران ئەڤ كارە ناكەڤیتە ژێر سیبەرا فەرهەنگا كوردی، دویرە ژ تیتالین كوردەواری و كەساتیا تاكێ كورد ئەڤە ژ لایەكیڤە، ژلایەكی دیڤە ئاستێ نەرەوشەنبیری، نەهشمەندی و نەدووربینیا ڤان كەسان ژبۆی جڤاكێ دیار دبیت، بەروڤاژی وینەكرنا رویدانێ ڤیابا هەمی هەول و بزاڤێن رزگاركرنێ ب هەر رێكەكا هەبیت دهەمان دەمدا بەردەست بیت ژ وان كەسێن رویدانێ ب چاڤێن خوە دبینن بهێتە چاڤەرێكرن ب وی مەرجی كۆ ژیانا وان نەكەڤیتە چ مەترسیێن مەزنتر، ب ئەركێ مرۆڤایەتی، مرۆڤبوونێ و كوردبوونێ راببن، ب ڤی رەنگی گیانێ هاریكاریێ پتر زەنگین دبیت و د ناڤ جڤاكا كوردی دا زێدەتر دهێتە چاندن و چەسپاندن, شویندار و گەشە دبیت، هەروەسا رەنگڤەدانەكا ئەرێنی ل سەر لایەنێن پەروەردەیێ، بوهایین رەوشتی، دەروونی و مرۆڤایەتی، كولتووری و جڤاكی.. دكەت، بەر ب باشتر ڤە دبەت ناكو دگەهیتە كۆپیتكا ئاستێ مرۆڤایەتیێ.
