كه‌مال كه‌ركووكی:پارتی باره‌گا ل كه‌ركووكێ نینن به‌لێ ژێ نه‌هاتیه دابڕین
ئه‌ڤرۆ:
ئه‌ندامێ مه‌كته‌با سیاسی یا پارتی دیموكراتی كوردستان و به‌رپرسێ ڕێكخستنا پارتی ل كه‌ركووك – گه‌رمیان، كه‌مال كه‌ركووكی، ڕاگه‌هاند، مه داخوازیه‌كا ڕاكان جبووری بۆ هه‌ڤدیتنێ ڕه‌تكریه و مه ئاگه‌هداركریه دێ وه‌كو ئه‌ره‌به‌كێ ئاسایی ڕه‌فتارێ ل گه‌ل كه‌ین.
ڕاكان جبووری، پارێزگارێ كه‌ركووكێ، كه‌سایه‌تیه‌كێ ئه‌ره‌بێ سوننه‌یه و پێشتر جێگرێ پارێزگارێ كه‌ركووكێ بوو، به‌لێ ل ڕۆژا 16 ئۆكتۆبه‌را 2017 ل ده‌مێ كوردان ده‌ستهه‌لات ل كه‌ركووكێ ژ ده‌ستدای، وه‌كو پارێزگار یێ ده‌ستبكاربووی و هه‌تا نوكه د وی پۆستی دا مایه.
كه‌مال كه‌ركووكی، ئه‌ندامێ مه‌كته‌با سیاسی یا پارتی دیموكراتی كوردستان وبه‌رپرسێ ڕێكخستنا پارتی ل كه‌ركووك – گه‌رمیان ، بۆ (ده‌نگێ ئه‌مریكا) ڕاگه‌هاند” ڕاكان جبووری خه‌لك هنارتیه ده‌ف مه تاكو وه‌كو پارێزگار ببینین، به‌لێ مه داخوازیا وی ڕه‌تكر و مه ئاگه‌هداركر كو دێ وه‌كو ئه‌ره‌به‌كێ ئاسایی ڕه‌فتارێ ل گه‌ل كه‌ین نه وه‌كو پارێزگار، چونكه ئه‌م وی ب پارێزگاره‌كێ نه شه‌رعی دزانین”.
هه‌رچه‌نده پارتی ڕه‌ت دكه‌ت وه‌كو پارێزگار ڕه‌فتارێ ل گه‌ل ڕاكان جبووری بكه‌ت، به‌لێ به‌ری دو حه‌فتیان هنده‌ك ده‌زگه‌هێن ڕاگه‌هاندنێ ل سه‌ر زارێ ڕاكان جبووری به‌لاڤكربوو كو ل گه‌ل شاخه‌وان عه‌بدوللا، ئه‌ندامێ كۆمیته‌یا ناڤین یا پارتی و جێگرێ سه‌رۆكێ جڤاتا نوونه‌رێن ئیراقێ هه‌ڤدیتن كریه.
كه‌مال كه‌ركووكی ل دۆر ڤێ چه‌ندێ دبێژیت” شاخه‌وان عه‌بدولای ل مالا خه‌میس خه‌نجه‌ر بوو، ڕاكان جبووری ژی سه‌ره‌دانا مالا خه‌میس خه‌نجه‌ر كر و ل وێرێ هه‌ڤدو دیتیه، ل وێرێ شاخه‌وانی هه‌موو كارێن خراب یێن ڕاكانی به‌رچاڤ كربوون و پێ ڕاگه‌هاندبوو ژی دانپێدانێ ب ته ناكه‌ین وه‌كو پارێزگارێ كه‌ركووكێ و ڕێككه‌فتنێ ژی ل گه‌ل ته ناكه‌ین”.
كه‌مال كه‌ركووكی ئاماژه‌كر” ڕاكان جبووری ب ئیمزایا سه‌ركرده‌یه‌كێ ئێكه‌تی نیشتمانی كوردستان د پۆستێ خوه دا یێ مای، تاكو ده‌مێ ئه‌نجامدانا هه‌لبژارتنێن جڤاتێن پارێزگه‌هان”.
پۆستێ پارێزگارێ كه‌ركووكێ پشتی ژناڤچوونا ڕژێما به‌عس ل سالا 2003 د ده‌ستێ كوردان دا بوو تاكو ڕۆژا 16 ئۆكتۆبه‌را 2017، به‌لێ ژ وی ده‌می ڤه ئه‌و پۆسته یێ دده‌ستێ ڕاكان جبووری دا كو كه‌سایه‌تیه‌كێ ئه‌ره‌بێ سوننه‌یه، كورد پۆستێ پارێزگارێ كه‌ركووكێ ب مافێ خوه دزانن و داخوازا وی پۆستی دكه‌ت به‌لێ پشكه‌ك ژ ئه‌ره‌ب و توركمانێن كه‌ركووكێ ڤێ داخوازیا كوردان ڕه‌ت دكه‌ن.
ل دۆر خواستا كوردان بۆ وه‌رگرتنا پۆستێ پارێزگارێ كه‌ركووكێ، ڕاكان جبووری پارێزگارێ كه‌ركووكێ بۆ ده‌نگێ ئه‌مریكا گوتبوو” ل سه‌ر ڤی بابه‌تی نا ئاخڤم ژ به‌ر كو پسپۆریا من نینه”.
پارتی دیموكراتی كوردستان كو ده‌مێ پێنج سالایه و پشتی 16 ئۆكتۆبه‌را 2017 باره‌گا ل كه‌ركووكێ نینن، كه‌مال كه‌ركووكی سه‌باره‌ت ڤێ چه‌ندێ دبێژیت” مه باره‌گا ل كه‌ركووكێ نینن، به‌لێ ژ خه‌لكێ كه‌ركووكێ نه‌هاتینه دابڕین، هنده‌ك ئالیان وه‌كو وێ چه‌ندێ كۆمپانیا ل كه‌ركووكێ دانابن و ل سه‌ر بژین، دژی زڤرینا پارتی و ڕاكرنا ئالایێ كوردستانێ نه”.
كه‌مال كه‌ركووكی دووپاتكر ژی” ئالیێن كوردی و شیعی و سوننی یێن ل سه‌ر كارنامه‌یا حوكمه‌تا محه‌مه‌د شیاع سودانی ڕێككه‌فتین و شاندێ دانوستاندكار یێ هه‌رێما كوردستانێ و ئیراقێ چاڤه‌ڕیێ بجهئینانا ڕێككه‌فتنان و ئاساییكرنا ڕه‌وشا كه‌ركووكێ نه”.
