كورتە فلمێ (No Signal) پلەیا ئێكێ ل فێستیڤالا مسرێ وەرگرت
دلڤین رەشید
دەرهێنەر (ئێڤار عومەر) د دیدارەكێ دا بۆ رۆژنامەیا ئەڤرۆ گۆت: ئەز ل سەر كارێ خۆ یێ هونەری یێ بەردەوامم و بەری چەند رۆژان كورتە فلمێ من (No Signal) شیا پلەیا ئێكێ وەكو باشترین كورتە فلم ل فێستیڤالا مسرێ وەربگریت و ئەڤ چەندە ژی وەكو كوردەك بۆ من جهێ شانازیێ یە، چنكو كورتە فلمێ من د هەڤڕكیەكا دژوار دا دەرباز بوو هەتا شیای وی خەلاتی وەربگریت.
هەروەسا گۆت: دوێ فێستیڤالێ دا (197) فلم و كورتە فلم ژ (15) وەلاتان تێدا د پشكداربوون و پشتی هەلسەنگاندنەكا هوور ئەندامێن لژنێ بڕیار دان وی خەلاتی پێشكێشی كورتە فلمێ من بكەن و خالا سەرەكی و سەرنجڕاكێش دڤی بەرهەمی دا ئەوە كو ئەڤ كورتە فلمە بتنێ ب مۆبایلێ هاتیە گرتن و ئەڤ چەندە ل دووف هێزو شیانێن دەرهێنەری و ستافێ كاری دمینیت كو ب كێمترین ئامرازێن تەكنیكی شیا پەیامەكا مەزن یا هونەری بگەهینیت و سەرنجا دادوەرێن فێستیڤالێ یێن نێڤدەولەتی بۆ لایێ خۆ ب ڕاكێشیت.