كوردان گەلەك ماندیبوون و زەحمەت كێشایە و گەلەك شەهید بۆ ڤێ ئاخێ داینە و داخوازێ دكەین ئێكبگرن
دیدار، سالار محەمەد دۆسكی:
پێشمەرگێ هەر دو شۆڕەشێن ئیلون و گولانێ (عزەت مستەفا گەردی ڕەشەڤایی) بەرنیاس ب (عزەت ڕەشەڤایی) ل سالا 1955 ژ دایك بوویە، بابێ وی ل سالا 1961 ل سەر قشلا ئامێدیێ شەهید دبیت، هەتا قوناغا دووێ سەرەتایی خواندیە، بنەمالا وی دا سێ شەهید هەنە(باب، مام، برازا) پێنچ جاران بریندار بوویە و چاڤەكێ خوە ژ دەست دایە و ئەنفالان قەستا وەلاتێ توركیا كریە و دووڤدا هاتیە (زێوە) و سەرهلدانێ ڤەگەریایە كوردستانێ.
عزەت ڕەشاڤەیی پێشمەرگێ هەر دو شۆڕەشێن ئیلون و گولانێ بۆ رۆژناما ئەڤرۆ گۆت: رێكەفتی 11/6/1978 ل گوندێ (بیادەرێ) من پەیوەندی ب پێشمەرگەی كر و پێشتر درێكخستی بوون ل گەل رێكخراوا (پرا كەلیا) كر وی دەمی بەرپرسێ مە (حەسەن عەزیز) ل گوندێ ڕەشەڤا و مە چالاكی و رێكخستن ئەنجامدان وەك رێكخستن و ل گوندێن(هێتیت، هاریكارك، زێوە، كانی صارك، سێری ) هەمی گوندێن نێهلی یا مە رێكخستن و چالاكی دكرن وی دەمی رێكخستن گەلەك یا كێم بوو، ل سالا 1975ێ شكەستنێ هندەك چوونە ئیرانێ و هندەكا ژی خوە رادەستی حوكمەتێ كر، و پێشمەرگە (سەعید عەبێ) هەبوو ل چیا بوو هەتا سەركردایەتی یا بەروەخت هاتیە دەڤەرێ و رێكخستن جارەكا دی هاتنە دروستكرن ڤە و ب شێوەكێ نهێنی و گەلەك ترس هەبوو، ل سالا 1977 بەرپرسێ رێكخراوا مە هاتە دەستەسەركرن، و دووڤدا هاتە ئازادكرن و پشتی ئازادكری مە پەیوەندی ب شۆڕەشێ كر، وی دەمی هەر كەسەكێ پەیوەندی ب پێشمەرگەی كربا دڤیابا ل دەسپێكێ قەستا بارەگایێ سەركردایەتیێ كربا، لێ چونكە مامێ مە (ئیبراهیم) ل ناڤ شۆڕەشێ بوو و دیسا ئەم ژی سێ بووین و بەرپرسێ رێكخراوا مە ل گەل مەبوو باوەری ب مەهات و نەچووینە بارەگایێ سەركردایەتییا بەروەخت.
عزەتی گۆت: دەمێ زڤرینێ ل ڕەشەفا كەفتینە كەمینەكێ و هەڤالەكێ مە دگۆتنێ (سەلام گەرەگوهی) شەهید بوو و ئێكەم شەر بوو پشكداربوویم وێ كەمینێ ئەز ل بەرا هەڤالێن خوە دچووم و كەفتمە ناڤ لەشكری و هێرشی مە هاتەكرن، و هەڤالەكێ من 40 میترا یێ دوور بوو شەهید بوو و پێشتر مە زانی ئەو جهێ ب مەترسی یە وی جهی من مرنا خوە دیت.
عزەت ڕەشاڤایی دیاركر: ل سالا 1978 ئەم 15 پێشمەرگە بووین 14 ب چەك بوون و ئێكێ بێ چەك بوو وی دەمی حوكمەت ژی هاتبوو دەڤەرێ ل گوندێ هێتیتی بووین، و مە سپێدێ دیت حوكمەت هاتیە گوندێ ڕەشاڤا وی دەمی مامێ من (براهیم و بابێ شڤان) گەلەك شارەزا بوون و ئەوا گۆت دێ حوكمەت ڤەگەریتە گەلیێ ڕەشاڤا و مە بەراهی یا حوكمەتێ گرت و مەهاڤێتێ و مەزنترین شەڕ ل دەڤەرێ مە دورستكر و مە 84 ژ لەشكری دەستە سەركرن و هەڤالەكێ مە بریندار بوو.
ناڤبری گۆت: دەمێ نەكسە ب شۆڕەشێ كەفتی خەلكێ مە گەلەك بێ ئومێد بوو و دەمێ شۆڕەشا گولانێ گەلەك باوەری بۆ خەلكی دروست بوو و مە ژ پارێن خوە چەك كری و گەلەك ب گەرمی زڤرینە ڤە و مە گەلەك چالاكیێن مەزن ئەنجامدان.
عەزەتی خوەیاكر: ل شۆڕەشا گولانێ پێشمەرگە وەك زنجیر بوو و هەر ئێكی دگۆتە یێ پشت خوە (هات) و هەتا دگەهشتە یێ دووماهیێ و جارەكا دی ئەو ئاحفتن ڤەدگەراندە ڤە و هەر ئێكی زانی كیش پێشمەرگە دووڤدا دهێت و بڤی رەنگی مە پەیوەندی ل گەل ئێك هەبوو ، و ئەڤە تایبەت ل جهێن مەترسی مە بڤی رەنگی هاتن و چوون دكر.
هەروەسا گۆت: ل عەملیاتا دێرەلوكێ پشكداربووم وی دەمی ل گەل (سمكو ئامێدی) بووم و ئەو لژنا گولان بوو ئەز و نوزاد و حەسەن و بادی پشكدار بووین و عەملیاتەكا مەزن بوو و مە حەفت شەهیددان، و ئێزگەی رۆلەكێ مەزن هەبوو و (مەسعود سەرنی، شەعبان) رۆلەكێ مەزن هەبوو و دەمێ چالاكیێن مە دخاند و هوسا هانداین بچین هێرشا بەردەوام بكەین.
ناڤبری گۆت: پێنچ جاران بریندار بوویمە و دووماهی جار ل (حەفت تەنینێ) تێنتی ب من پەقی، جارەكێ شەرەكێ گران مە ئەنجامدا و بتنێ مامە ل رەبیێ دا و هەڤالێن مە پاشكێشی كر و دووڤ دا زڤرینە ڤە و شیاین ب سەركەڤین بۆ هەر جارەكێ هەر بەرپرسەكێ پێشمەرگەی یێ فەرمان دایە مە كو ڤی جهی بین مە جهێ خوە بەرنەدایە و سوپاس بۆ خودێ و هەر جهێ چووینێ ژی مەیێ رزگاركری و چالاكیێن پێشمەرگەی ل كانی ماسێ و دێرەلوكێ و گەلەك دەڤەرێن دی دەنگەكێ مەزن ڤە دا.
پێشمەرگێ شۆڕەشا گولانێ گۆت: شۆڕەشا گولانێ گەلەك ب گەرم و گوری گەنجا قەستا ناڤ شۆڕەشێ دكر، و چونكە هەمی یا هزر دكر كو خودان ئاخ و دیرۆكین و مە ژی دڤێت بگەهینە ئارمانجەكێ و مە وەلاتێ خوە هەبیت و دەولەتا خوە هەبیت و ب ئازادی و سەربەستی بژین.
ناڤبری گۆت: شورەشا ئیلونێ چەپەر هەبوو ل گەل حوكمەتێ و شورەشا گولانێ پارتیزانی بوو و هەر جهێ چالاكیەك كربا دڤیابا ب نهێنی بوو و هاتن و چوون هەمی ب شەڤ بوو و دوژمنی كەمینە ڤەدان و گەلەك ب نهێنی چوو، شورەشا گولانێ مە گەلەك عملیات كرن و جارەكێ مە ل (سیریێ) كر و دیسا هاریكاری ژی هەبوو ژلایێ رێكخستیێن مە ڤە دناڤا باژێران دا.
پێشمەرگێ هەر دو شورەشێن ئیلون و گولانێ، عزەت رەشاڤای گۆتژی:
كوردان گەلەك ماندیبوون و زەحمەت كێشایە و گەلەك خەلكی خوە دایە كوشتن پێخەمەت ئازادیێ لەوما داخازا مە ژ سەركردایەتی یا پارتی ئەوە خوینا ئەڤان شەهیدان بەرزە نەبیت و ئێكبگرن دا باوەری پتر بۆ خەلكێ مە دروست بیت خەلكی گەلەك قوربانی دایە، (بابێ من، مامێ من برازایێ من شەهیدن) و من چاڤێ خوەیێ راستێ ژ دەست دایە سەخمراتی ڤێ ئاخێ و خەلكی ئومێد نەمایە. چونكە ژیان گەلەك بزحمەت كەفتیە هەر دەم نەخوشیە و دبینین رۆژ بۆ رۆژێ دوژمنێن مە یێ بزاڤا دكەن قەوارێ هەرێما كوردستانێ كێم كەن و داخازا مە ئەوە ئەف زحمەت ب هەروە نەچیت و ئێكبگرن.
