كورێمێ. .. . كاره‌ساته‌كا جه‌رگبڕ
به‌ری بیست و هه‌فت سالان ل 28/8/1988 د ئه‌نفالێن ره‌ش دا، ڕه‌فه‌كا خۆرت و كوردپه‌روه‌ێن بێ گونه‌ه یێن گوندێ كورێمێ و چه‌لكێ بوونه قوربانی كاره‌كێ چه‌په‌ل و هۆڤانه‌یێ ڕژێما به‌عس و سیاسه‌تا شاشا ناڤنه‌ته‌وه‌یی ل هه‌مبه‌ر مرۆڤاتیێ و خوینا وان تێكلی ئاخا گوند و وه‌لاتێ وانا بوو ـ د هه‌مان رۆژێ دا ل 28/8/2015 ل گوندێ كورێمێ ئه‌ڤ بیرهاتنا تال ب رێوره‌سمه‌كا لاواز هاته زندیكرن، یا بالا من د ڤێ رێوره‌سمێ دا كێشای مینیۆمێنتا شه‌هیدێن ڤێ بوویه‌رێ بوویه كو د سالێن بووریدا سۆزا ئاڤاكرنا وێ ب كه‌س و كارێن شه‌هیدا هاتبوو دان و هه‌ر ل ده‌قیقه‌یا ڤه‌كرنا وێ هنده‌ك نڤێسین ژێ چێبوون وه‌ك وان جاده‌یێن كو هێژ نه ڤه‌كرین ته‌سه د كه‌ڤنێ، گه‌لۆ ما هه‌تا كه‌نگی دێ كارێن مه د ژی كورت بن؟! پاشی د رێوره‌سما دا بۆچی تشته‌ك بۆ وی گوندی و كه‌س و كارێن شه‌هیدا ناهێته پێشكێشكرن كو هێژ وی گوندی ب دروستی رێ یا ترۆمبێلێ نینه، یان ب بوورن ئه‌ز شاشم، سوپاس هه‌ما بیر ل ڤێ بوویه‌رێ دهێته كرن به‌سه، چونكی هه‌كه هزرا كور و كچێن وان شه‌هیدا نه‌بیت هه‌ر رێوره‌سم ژی دێ خه‌ون بیت ـ لێ نه گرنگه چونكی حكمه‌ت و سازی یێن پارتیتی ژی هه‌ر ڕه‌نگڤه‌دانا جڤاكێ یه و باوه‌ربكه‌ن ئه‌م زوی ڕابدۆیێ خۆ ژبیر دكه‌ین و ب سه‌دان تشتێن گرنگ و مه‌زن قوربانی یه‌ك تشتێ بچویك دكه‌ین، به‌لكی هه‌بووینه پشتی ڤان هه‌می كاره‌ساتێن مه‌زن و جه‌رگ بڕ یێن ب سه‌ر ملله‌تێ مه دا هاتین ب بڕینا یه‌ك سه‌عه‌تا ئه‌له‌كتریكێ هه‌می ده‌رده‌سه‌ری یێن به‌رێ ژ بیر كرینه و گۆتیه ده‌سهلاتا به‌عسیان باشتره ژ یا كوردستانێ، له‌وما هه‌كه سازی یێن فه‌رمی ژی هنده‌ك جاران بیر ل هنده‌ك بوویه‌رێن مه‌زن نه‌هێت!! د ڤێت لێ نه‌گرین هه‌ر ئه‌م ب خۆینه ـ یا گرنگ ژبۆ نها ئه‌م ل سه‌ر ڕاوه‌ستین پاراستنا ئه‌زموونا كوردستانێ یه كو ب ساناهی نه‌هاتیه ده‌ست، ب درێژی یا دیرۆكێ گه‌لێ كورد ل سه‌ر ده‌ستێن داگیركه‌ر و سته‌مكاران تووشی ب سه‌دان چام و كاره‌ساتێن بێ وێنه بوویه، ژ كوشتن، مالوێرانی، ده‌ربده‌ری و هه‌تكبرنێ ـ ب دژواری و به‌رده‌وام راستی هه‌وێن جینۆساید و ژناڤبرنێ و گوهه‌رتنا نه‌ژادی و دیمۆگرافی هاتیه، وه‌ك ئه‌نفال، كیماباران، قركرنا نه‌ژادی، ڕاگوهه‌ستن، بڕین و دانانا سینووران ل گۆڕه‌ی به‌رژه‌وه‌ندیان و مشه‌ختی و په‌نابه‌ری و ئاواره‌بوون بوویه به‌شه‌ك ژ ژیانا گه‌لێ كوردستانێ یێ سته‌م دیدی ـ كۆمكوژی یا گوندێ كورێمێ ژی وه‌ك یه‌ك ژ كاره‌ساتێن به‌رچاڤێن ده‌ڤه‌را به‌هدینان تێته نیاسین و دیكۆمێنته‌كا خوینه‌لۆ یا ساخ و زندیه ل سه‌ر ته‌وانێن رژێما به‌عسا رووخیایی یێن ل دژی گه‌لێ كوردستانێ و نا مرۆڤانتیێ ب گشتی ئه‌نجامداین ـ بێ گومان ئاخ و ملله‌ت دو تشتێن ژێك نه جودانه و ته‌مامكه‌رێن ئێكن، بێی خه‌بات و تێكۆشان و قوربانیدان ژی چ تشته‌ك بده‌ستڤه ناهێت ـ یا ئه‌ڤرۆ ئه‌م دبینین، ژ ئازادی، ئارامی و پێشڤه‌چوونا د هه‌ر واره‌كێ ژیانێ دا، ده‌وله‌ت سه‌رێ خوینا وان شه‌هید و خه‌بات و تێكۆشینا كوردستانیان بوویه ب هه‌می ته‌خ و چوین و ئایینان ڤه، ئه‌ڤ كاره‌سات و ته‌ڤایا كاره‌ساتێن ب سه‌رێ ڤی ملله‌تی هاتین ژی بێی جوداهی یا ئۆلی و نه‌ته‌وه‌یی و مه‌زهه‌بی بوویه و تنێ ناسنامه‌یا كوردستانی سه‌ده‌ما سه‌ره‌كی یا په‌رچقاندن و ته‌په‌سه‌ركرنێ بوویه. ئانكۆ دوژمن و داگیركه‌ران ب هه‌ولێن خۆ یێن قركرنا نه‌ژادی و سته‌ما ته‌ڤاگیر یا كوردستانیان پرۆسه‌سا پێكڤه‌ژیانا ئۆلی و نه‌ته‌وه‌یی یا كوردستانیان پتر خورت و موكم كریه !! گه‌لۆ پشتی ڤی ملله‌تی بێهنا ئازادیێ هه‌لكێشای، هه‌ست ب هه‌بوونا خۆ كری، ڕه‌وشا ئابووری هه‌تا ڕاده‌یه‌كا باش پێشكه‌تی و ل سه‌ر ئاستا ناڤنه‌ته‌وه‌یی ژی گه‌لێ كوردستانێ ب مێرانی و مه‌ردینی و مڕۆڤانتیێ هاتیه هه‌مبێزكرن، ژ نوی یه‌كڕزی و پێكڤه ژیان و یه‌ك قه‌بوولكرن د ناڤا مه بخۆ دا لاواز ببیت و ب كه‌ڤیته به‌ر مه‌ترسیێ كو هێڤێنێ هه‌ر سه‌ركه‌تنه‌كێ یه‌كڕزی یه؟!! بێ گومان ئه‌ڤه ژی هه‌وله‌كا دی یا داگیركه‌ران یا ئه‌نفالكرنا كوردستانیانه و گه‌له‌ك ژی ژ كۆمكوژیه‌كا وه‌ك گوندێ كورێمێ مه‌زنتره و د ڤێت ملله‌ت ل هه‌مبه‌ر ده‌ركه‌ڤیت و نه‌هێلیته ب هیڤی یا ئالیێن سیاسیڤه چونكی قوربانیێ یه‌كێ و دوماهیێ د ڤان هه‌ڤكێشان دا هه‌ر ملله‌ته.
