كچێن دهۆك و زاخۆ د دو تاقیكرنێن ب زەحمەت دانە
قەیس وەیس:
بڕیارە سوبەهی ئەینی ل دەمژمێر دو یێ پشتی نیڤرۆ هەردو یانەیێن ئافەرتێن دهۆك یانەیا زاخۆ یا كچان پێنگاڤا خوە یا ئێكێ ژ چارچووڤەیێ قۆناغا چارگۆشەیا زێرین یا خولا فوتسالا كوردستانێ ژ یاریا ئێكێ دا دناڤ ئەرد و جەماوەرێ خوە دا پاڤێژن.
ل هۆلا گرتییا چالاكیێن وەرزشی تیما ئافرەتێن دهۆك دێ مێڤاندارییا سیروانی حەلبجە كەت د یارییەكا گرنگ و تاقیكرنا ئێكێ یا چوونێ دا كەت، ب هیڤیێن مەزن و شەڕێ سەركەفتنێ ئافرەتێن دهۆك دێ هێنە دناڤ یاریێ دا، بەرانبەر دا تیما سیروانی حەلبجە خودان یاریزانێن شیانە و ئاستەكێ مەزن نیشان دایە، تیما ئافرەتێن دهۆكێ شیا ببیتە قارەمانا كۆما خوە و دەربازبیتە قۆناغا چارگۆشەیا زێرین پشتی ب شەش سەركەفتنێن ل دووڤ ئێك و چو خوسارەتی و وەكهەڤی نەداینە، ب كۆمكرنا 18 خالان سەرێ لیستەیا كۆما ئێكێ هات، سیروانی حەلبجە د كۆما دویێ دا رێزا دویێ هاتبوو ب كۆمكرنا 11 خالان.
ژلایەكێ دووڤە تیما كچێن یانەیا زاخۆ ل هۆلا زانكۆیا زاخۆ مێڤاندارییا كچێن یانەیا سۆران كەت د یارییەكا پڕی هەڤڕكی و هێز دا، كچێن خابووری ژی وەكو قارەمانا كۆما دویێ دەربازبوو چارگۆشەیا زێرین پشتی ب كۆمكرنا 12 خالان سەرێ لیستێ هاتی ژ سێ سەركەفتن و سێ وەكهەڤییان و هیڤیێن وێ ژی دەستڤەئینانا ناسناڤی یە، بەرانبەر دا كچێن سۆران دەربازبوویە ڤێ قۆناغێ پشتی د كۆما ئێكێ دا 12 خال كۆمكرین و رێزا دویێ هاتی.
