كچێن پارێزگەها دهۆكێ كۆنترۆلا ناسناڤێ ئیراقێ كرن
هەرسێ كچێن پارێزگەهێ و یانەیا دهۆكێ لارا ئاڤدەل، زەلال سەعید و هانا ئاڤدەل كۆنترۆلا ڕێزێن پێشیێ یاقارەمانییا ئیراقێ بۆ یارییا تێنسا ئەردی ل سەر ئاستێ كچان یا ڤەكری كر، د هەڤڕكیێن واندا ئەوا ب پشكدارییا 20 یاریزانان ل یاریگەهێن یانەیا دهۆك یا وەرزشی هاتیە كرن.
ل دور ڤێ دەستكەڤتێ دیار ئیبراهیم سەرۆكێ فدراسیۆنا تێنسا ئەردی ل پارێزگەها دهۆكێ بۆ رۆژنامەیا ئەڤرۆ گۆت: ئەڤ قارەمانییە ل دووڤ بەرنامەیەكێ تایبەت یێ فدراسیۆنا تێنسا ئەردی یا ئیراقێ بوو هاتیە كرن و ب هەڤكارییا لژنەیا ئۆلمپییا ئیراقێ تایێ دهۆكێ و ژلایێ مە ڤە هاتبوو ڕێكخستن، ئەوا 20 كچێن ژیێن وان د ناڤبەرا 14 بۆ 30 سالی دا هەڤڕكییا ناسناڤێ قارەمانییا ئیراقێ یا ڤەكری كر كو ژ هەرێما كوردستانێ و ناڤەڕاست و باشۆرێ ئیراقێ پشكداربوون پشتی دو رۆژێن هەڤڕكییان سێ كچێن پارێزگەهێ شیان كۆنترۆلا قارەمانیێ بكەن و بڤی شێوەیی، لارا ئاڤدەل بوو قارەمان، زەلال سەعید ڕێزا دویێ هات و هانا ئاڤدەل ڕێزا سێیێ ب دەستڤە ئینا.
هەروەسان ناڤهاتی گۆت: ئەڤ قارەمانییە یا ڤەكری بوو و ل سەر ئاستێ تاك دهاتە كرن هەر كچەكا یاریزان دشیا پشكداربیت، حەفت یاریزانێن كچ ل دهۆكێ پشكداربوون ئەڤە ژی ڕێژەكا گەشبینە و دلخوەشكەرە، بۆ مە گرنگ ئاستێ كچێن مە سال بۆ سال بەر ب باشتر دچیت و خوە پێش دئێخن، دڤێ قارەمانیێ دا هەڤڕكییەكا ب هێز هەبوو، پێخوەشحالین كچێن مە شیان ڕێزێن ئێكێ بهێن و هەڤڕكییا ستێرێن دی یێن ئیراقێ بكەن.
ل دۆر گرنگییا ڤێ قارەمانیێ دیار ئیبراهیم گۆت ژی: ئەڤ قارەمانییە ژ چالاكیێن هەرە گرنگە یێن فدراسیۆنێ و مەرەما سەرەكی هەلسەنگاندنا ئاستێ یاریزانایە بەری پشكدارییا هەر قارەمانییەكا دەرڤە بهێتە كرن، پێنەڤێت هەرسێ یاریزانێن مە شیان جهێ خوە د ناڤ ڕێزێن هەلبژارتیێ ئیراقێ دا پارێزێن بۆ وەرزێ 2026ێ هەر قارەمانیەك هەبیت، لێ دڤێت بەردەوام خوە پێشبێخن دا جهێ وان پاراستی بیت.
