كۆربه‌نده‌ك ل دۆر سه‌رهلدانا باژێرێن دهۆك و سێمێلێ هاته ئه‌نجامدان
ئه‌ڤرۆ:
ب ئاماده‌بوونا د. عه‌لی ته‌ته‌ر پارێزگارێ دهۆكێ و سه‌رۆكێن زانكویێن دهۆك و زاخۆ و چه‌ند به‌رپرسێن حزبی و ئیداری و وه‌لاتیێن پشكدار د سه‌رهلدانێ دا و قوتابییان، دوهی سپێدێ 15/ 3/2022 ل هۆلا كۆنفرانسان ل كۆلیژا زانستێن مرۆڤایه‌تی پشكا مێژویێ ل زانكۆیا دهۆكێ ب هه‌ڤكاری د گه‌ل رێڤه‌به‌ریا گشتی یا ره‌وشه‌نبیری و هونه‌ری كۆربه‌نده‌ك ل ژێر ناڤێ (ساخكرنا بیره‌وه‌ریا سه‌رهلدانا دهۆكێ د ئادارا سالا 1991دا ) ئه‌نجام دا.
ل به‌راهیێ د. داود سلێمان سه‌رۆكێ زانكۆیا دهۆكێ په‌یڤه‌ك پێشكێشكر و گرنگیا سه‌رهلدانێ به‌رچاڤكر كو چه‌ندین ده‌ستكه‌فت ژێ په‌یدابوینه ژ رویێ سیاسی و ئابووری و زانستی و گۆت:( دێ هه‌ولده‌ین كو نڤشێ نوو ب رێكێن زانستی پێبگه‌هینین بۆ خزمه‌تكرنا گه‌ل و وه‌لاتی).
ل دووڤ دا، د. عه‌لی ته‌ته‌ر پارێزگارێ دهۆكێ د په‌یڤه‌كێ دا پیرۆزباهیا خه‌لكێ هه‌موو باژێرێن پارێزگه‌هێ كر ب هه‌لكه‌فتا بورینا 31 سالان ل سه‌ر سه‌رهلدانێ و ئاماژه‌دا كاودانێن به‌ری سه‌رهلدانێ و ئه‌و نه‌هامه‌تیێن ل سه‌ر ده‌ستێ رژێما به‌عس یا وی سه‌رده‌می ب سه‌ر گه‌لێ كورد هاتین.
هه‌روه‌سا گۆت: دمێژویا كوردستانێ دا چ تشته‌ك وه‌كو سه‌رهلدانێ خۆشتر مه‌زنتر و گرنكتر بۆ گه‌لێ كورد په‌یدانه‌بویه و سه‌رهلدان روودانه‌كا مێژویی یا پڕی ده‌ستكه‌فت بوو و داخواز ژ ڤه‌كوله‌ر و مێژونڤیسان كر كو زۆر گرنگیێ ب سه‌رهلدانێ بده‌ن و هه‌موو روودانێن وێ تۆمار بكه‌ن و بكه‌نه په‌رتووك و به‌لگه‌یێن دیكیومه‌نتاری دا نه‌ڤیێن نوو بخوینن و شانازیێ پێ بكه‌ن.
پاشی فلمه‌كێ دیكیومه‌نتاری ل دۆر سه‌رهلدانا دهۆكێ هاته به‌رچاڤكرن.
پاش هه‌ر ئێك ژ ئیسكان یوسف و محیه‌دین مه‌عروف و پێشمه‌رگێ دێرین خالد بانی باسێ به‌رهه‌ڤیێن سه‌رهلدانا باژێرێن دهۆكێ و سێمێلێ كر.
ل دووماهیێ خه‌لاتێن رێزگرتنێ ل سه‌ر هه‌رسێ پشكدارا هاتنه به‌لاڤكرن.
