كۆنفرانسەكێ نێڤدەولەتـی ل دۆر ژینگەهێ دێ هێتە گێڕان
هەولێر، قائید میرۆ:
بڕیاردەرێ جڤاتا ژینگەها هەرێما كوردستانێ خویاكر، كۆنفرانسەكێ نێڤدەولەتی ل دۆر پرسا ژینگەهێ دێ هێتە گێڕان و دبێژیت: نوكە ژینگەها هەرێما كوردستانێ ژ بەری چەندین سالان پاقژترە و چەندین پێنگاڤ هاتینە هاڤێتن بۆ پاراستنا ژینگەهێ.
ئەحمەد محەمەد، بڕیاردەرێ جڤاتا ژینگەها هەرێما كوردستانێ بۆ رۆژناما ئەڤرۆ دیاركر، بیاڤێ ژینگەهێ ل ئەڤان سالێن دوماهیێ زۆر پێشڤەچوویە و نوكە ژینگەهەكا پاقژتر هەیە، ژ ئەگەرێ ئەڤان پێنگاڤێن حوكمەتا هەرێما كوردستانێ بۆ پاراستن و پاقژڕاگرتنا ژینگەهێ هاڤێتین و گۆت: «لسەر فەرمانا سەرۆكێ حوكمەتێ، مەسرور بارزانی چەندین بڕیار و پێنگاڤ هاتینە هاڤێتن پێخەمەت پاقژكرنا ژینگەهێ، بڕیارە ل داهاتی كۆنفرانسەكێ نێڤدەولەتی ژی ل دۆر ژینگەها هەرێما كوردستانێ بهێتە گێڕان».
ئەحمەد محەمەد گۆت ژی: «پڕۆژەیێ رۆناهی كاریگەریێن زۆر باش لسەر پاقژكرنا ژینگەهێ هەبووینە، چونكی هەژمارەكا زۆرا موەلیدەیان هاتینە ڤەمراندن، هەروەسا گرتنا پارزنگەهێن نەقانوونی و دەركرنا چەندین بڕیار و رێنومایێن رەوشا ژینگەهێ بەرەڤ باشترە، ئەم یێ كار دكەین وەكی لایەنەكێ چاڤدێر رەوشا ژینگەهێ هێشتا باشتر بكەین و ل سالێن داهاتی، ل گورەی پلانا حوكمەتێ دێ ژینگەها هەرێمێ هێشتا باشتر لێ هێت».
