كۆنفڕانسه‌ك ل دۆر كه‌رتێ په‌روه‌ردێ دێ هێته ئه‌نجامدان
هه‌ولێر، قائید میرۆ:
بڕیاره بۆ زێده‌تر ده‌وله‌مه‌ندكرنا پڕۆژه‌قانوونا په‌روه‌ردێ كۆنفڕانسه‌ك ل دۆر كه‌رتێ په‌روه‌ردێ بهێته ئه‌نجامدان و ئه‌ندامه‌كا لیژنا په‌روه‌ردێ ژی دبێژیت: هه‌موو بزاڤ دهێنه كرن بۆ ده‌ركرنا قانوونه‌كا گونجای بۆ به‌ره‌فپێشبرنا كه‌رتێ په‌روه‌ردێ.
گولستان باقی، ئه‌نداما لیژنا په‌روه‌ردێ ل په‌رله‌مانێ كوردستانێ بۆ رۆژناما ئه‌ڤرۆ دیار كر، په‌رله‌مان و حوكمه‌تا هه‌رێما كوردستانێ مژوولی پڕۆژه‌قانوونا كه‌رتێ په‌روه‌ردێنه و گۆت: “بڕیاره قانوونه‌كا گونجای بهێته ده‌ركرن بۆ زێده‌تر پێشڤه‌برنا كه‌رتێ په‌روه‌ردێ، له‌وڕا ژی هه‌موو بزاڤه‌ك دهێته كرن و چه‌ند رۆژه لیژنا په‌روه‌ردێ و خواندنا بلند مژوولی پڕۆژه‌قانوونا په‌روه‌ردێیه ل هه‌رێما كوردستانێ و چه‌ندین گوهۆڕین تێدا هاتینه كرن”.
گولستان باقی گۆتژی: “بڕیاره بۆ زێده‌تر ده‌وله‌مه‌ندكرن و مفا وه‌رگرتن ژ كه‌سێن شاره‌زا و بسپۆر كۆنفڕانسه‌ك ل دۆر كه‌رتێ په‌روه‌ردێ ل هه‌رێما كوردستانێ بهێته گێڕان و تێدا مفا ژ ئه‌زموون و بۆچوونێن پشكدارێن كۆنفڕانسی بهێته وه‌رگرتن، ژ به‌ركو كه‌رتێ په‌روه‌ردێ گرنگیا خوه هه‌یه و پێدڤیه زێده‌تر پشكداری هه‌بیت بۆ ڤێ چه‌ندێ گوهۆڕین د سیسته‌مێ په‌روه‌ردێ دا بهێنه كرن”.
