كێشانا ئاڤێ ژ پشتا زارۆكی چو مەترسی نینە
د. بشار ابراهیم مزووری، تایبەتمەندێ نەخۆشیێن زارۆكان دیاركر گەلەك جارا زارۆك پێدڤی ب هندەك پشكنینان دبیت، ئێك ژ وان پشكنینان كێشانا ئاڤێ یە ژ پشتا زارۆكی.
ل دۆر وێ چەندێ كا ئەڤ پشكنینە بو چ دهێتەكرن، د.بشار ابراهیم دیاركر، كا چاوان دەمێ كەسەكی گۆمان ژ تووشبوونێ ب شەكرێ هەبیت، پێدڤیە پشكنینا خوینێ بكەت، یان گۆمان ژ هەودانێن دەستئاڤا زراڤ هەبیت، پێدڤیە پشكنینا دەستئاڤێ بكەین، هەروەسا هەكە مە گۆمانەك ژ مەژی هەبیت یان پەردا مەژی (سحایا) پێدڤیە ئەم پشكنینەكێ بۆ بكەین، ئەو پشكنین ژی ب رێكا كێشانا پیچەك ئاڤێ یە ژ پشتا زارۆكی.
د.بشار ابراهیم، دیاركر كو هندەك جارا ئاریشەك پەیدادبیت دەمێ ئەم بەحسێ وێ پشكنینێ دكەین، دایباب د ترسن و دبێژن مە نەڤێت وێ پشكنینێ بكەین، د ترسین زارۆكێ مە شەلەلی ببیت و گۆت: هەتا نوكە چ ڤەكۆلینان دیارنەكریە كو ئەڤ پشكنینە شەلەلێ چێدكەت و چ بنیات بو نینە، چونكو ئەو جهێ ئەم ئاڤێ ب دەرزیكێ ژێ دكێشین، دووماهیا (حبل الشوكی) و ئەم ل وێرێ پشكنینێ دكەین.
ل دۆر گرنگیا وێ پشكنێنێ، تایبەتمەندێ نەخۆشیێن زارۆكان دیاركر كو گرنگیا وێ د وێ چەندێ دایە، هەكە تە زانی هەودان هەیە یان نە، دێ دەرمانێن پێدڤی دەینێ بۆ چارەسەریێ و گوت: گەلەك جارا ئەم ب كاردئینین وەكو چارەسەری ژی بو نموونە هەكە پەنجەشێر هەبیت ئەم بزانین كا نەخۆشیا وی بەلاڤبوویە بۆ سەری یان نە و چارەسەردكەین و هندەك جارا ژی هەكە فشارەكا زێدە ل سەر مەژی بیت، ئەو پشكنین وەكو چارەسەری دهێتەكرن، لەورا نابیت دایباب ب تڕسن، چونكو وەك پشكنین و چارەسەری پێكڤە دهێتەكرن و چ مەترسی تێدا نینە و گۆت: هەتا ئەم پشتراست نەبین زارۆكی پێدڤییا پێ هەی ئەم ئەنجام نادەین.
