لقێ ئێکێ پارتی: شۆڕشا گۆلانێ بەرسڤا رێککەفتنا خیانەتکاری یا جەزائیر بوو
ئەڤرۆ نیوز:
لقێ ئێکێ پارتی دیموکراتی کوردستان ب ھەلکەفتا شۆڕشا گۆلانا پێشکەفتنخواز، بەیاننامەک بەلاڤ کر و تێدا ئاماژە ب وێ چەندێ کریە کو شۆڕشا ٢٦ی گۆلانا پێشکەفتنخواز ل سالا ١٩٧٦ێ دەستپێکا قووناغەکا نوو یا خەبات و بەرخوەدانا بزاڤا رزگاریخوازیا گەلێ کوردستانێ بوو ب سەرکردایەتیا بارزانیێ نەمر و درێژەپێدانا شۆڕشا ١١ی ئیلۆنێ بوویە و بەرسڤا رێکەفتنا خیانەتکاری یا جەزائیر بوو ل سالا ١٩٧٥ێ کو د ناڤبەرا شاھێ ئیرانێ و رژێما بەعسا دکتاتوری ڤە ھاتبوو مورکرن ل دژی بزاڤا رزگاریخوازا گەلێ کوردستانێ.
لقێ ئێکێ پارتی د وێ بەیاننامێ دا خویا ژی کریە کو شۆڕشا گۆلانێ بەردەوامی ب کاروانآ کوردایەتی و نشتیمانپەروەری و دیموکراتخوازیێ دا و باشتر رێکخست و بھێز کرەڤە و بوو بناغێ ھشیاری و بەرخوەدانا خەلکێ کوردستانێ و تێدا ھاتیە: “دامەزراندنا بەرەیێ کوردستانی ب دەستپێشخەریا ئەندازیارێ ئاشتیێ ئدریسێ جوانەمەرگ دەستکەفتەکێ گرنگێ نەتەوەیی یێ شۆڕشا گۆلانێ بوو و بنیاتێ ئێکرێزیا تەڤایا پارت و ھێزێن سیاسیێن کوردستانێ بوو”.
ئاشکرا ژی کریە کو شۆڕشا ٢٦ی گۆلانێ پری فیداکاری و قوربانیدان بوویە و ب دەھان داستانێن قەھرەمانانە د گورەپانا تێکۆشینێ دا تۆمارکرینە ژ پێخەمەت بەرگریکرن ژ ھەبوون و مافێن ڕەوایێن خەلکێَ کوردستانێ و خوەراگری ھەمبەر چەکێ کیمیاوی و ھەوێن ئەنفالان.
لقێ ئێک د وێ بەیاننامێ دا دیار کریە کو سەرکردایەتیا شۆڕشا گۆلانێ رۆلەکێ سەرەکی ھەبوویە د بەرپابوونا سەرھلدانا بھارا سالا ١٩٩١ێ و پاراستنا ئێکرێزیا ناڤ مالا کوردی و پروسا دیموکراسی و ئازادی و سەروەریا ئەڤرۆ و تێدا ھاتیە: “جھێ شانازیێ یە کو پێشمەرگێن شۆڕشا گۆلانێ ئەڤرۆ ب ھەمان گیان د سەنگەرێن پاراستنا ئاخا کوردستانێ دانە دژی ھەر نەحەز و دۆژمنەکی و ئەزموونا خوە یا مێرخاسی و خوەراگریێ بۆ پێشمەرگێن گەنجێن ئەڤرۆ ڤەگوھاستی یە وەکو وانەکا کوردپەروەریێ، لەو سەرفەرازی بۆ دیرۆکا بەرخوەدانا پر ژ قوربانیدانا شەھید و پێشمەرگێن شۆڕشا ٢٦ێ گۆلانا پێشکەفتیخواز، دیسا دەستکەفتێن ئەڤرۆ ژ ئەنجامێ خەباتا پێشمەرگە و خەلکێ کوردستانێ نە و بەرھەمێ خوینا تەڤایا شەھیدێن کوردستانێ و سەروەرێ وان بارزانیێ نەمر و ئدریسێ ھەردەم ساخن”.
