لژنا كه‌فتنا مووسل دێ مالكى گازى كه‌ت
ئه‌ڤرۆ نيوز:
عه‌باس حه‌زاعى په‌رله‌مانتار و ئه‌ندامێ لژنا ڤه‌كۆلينێ دكه‌فتنا مووسل دا بۆ رۆژناما مه‌دا راگه‌هاند حه‌فتيا داهاتى ئه‌ندامێن لژنێ دێ كۆم بن سه‌باره‌ت ده‌نگدان ل سه‌ر گازيكرنا نورى مالكى سه‌رۆك وه‌زيرێن به‌رى و جێگرێ سه‌رۆك كۆمارێ نوكه يێ عيراقێ ژ به‌ر كو پێشتر ئه‌و فه‌رماندێ هێزێن چه‌كدار بوو ل عيراقێ.
ب گۆتنا حه‌زاعى لژنێ ل حه‌فتيا بۆرى خالد عوبێدى ژى گازى كربوو ب تۆمه‌تا وێ چه‌ندێ كو شيره‌تكارێ ئه‌سيل نوجێفى بوويه، به‌لێ ئه‌وى ئه‌و چه‌نده ره‌تكر ب به‌هانه‌يا وێ چه‌ندێ كو ل وى ده‌مى ئه‌سيل نوجێفى ده‌ستبكاربوونا وى ئيمزا نه‌كربوو.
پێشتر عه‌بدولره‌حيم شه‌مه‌رى، يێ په‌رله‌مانتار و ئه‌ندامێ لژنێ راگه‌هاند بوو كو سه‌ركردێن له‌شكرى يێن هاتينه به‌ر لژنێ و دانپێدان ل دۆر كه‌فتنا مووسل كرين، ئاماژه ب وێ چه‌ندێ دكه‌ن كو نورى مالكى سه‌رۆك وه‌زيرێن به‌رێ يێ عيراقێ و سه‌ركردێ هێزێن چه‌كدار ل وى سه‌رده‌مى ل ده‌مێ روودانا، هه‌موو ماف دابوونه ئه‌وان كو سه‌ره‌ده‌ريێ ل گه‌ل روودانا بكه‌ن، ژ به‌ر هندێ ژى ئاماژه ب وێ چه‌ندێ كربوو كو هه‌تا نوكه مالكى نه‌هاتيه گازيكرن.
