لژنەک بۆ قەرەبووکرنا جۆتیارێن گەنمێ وان سۆتی دێ چیتە بەغدا
شێخان، بارزان مزووری:
سەرۆکا لژنا دەڤەرێن کوردستانی یێن دەرڤەی ئیدارا ھەرێمێ ل پەرلەمانێ کوردستانێ بۆ ئەڤرۆ نیوز دیار کر، پشتی پێکئینانا کابینا نوو یا حوکمەتا ھەرێما کوردستانێ بەرنامە ھاتیە دانان کو لژنەک بھێتە پێکئینان بۆ وان ئاستەنگێن لبەرامبەری کوردێن ئاکنجیێن دەڤەرێن کوردستانی یێن دەرڤەی ئیدارا ھەرێمێ دروست بووین و لژنە ب مەرەما قەرەبووکرنا جۆتیارێن کورد یێن گەنمێ وان ھاتیە سۆتن دێ سەرەدانا بەغدا کەت.
جوان یونس، سەرۆکا لژنا دەڤەرێن کوردستانی یێن دەرڤەی ئیدارا ھەرێمێ ل پەرلەمانێ کوردستانێ خویا کر، ژ لایێ حوکمەتا عیراقێ ڤە ئامارەک ھاتیە دروستکرن کا گەنمێ چەند جۆتیارا ھاتیە سۆتن و گۆت: “ل دووڤ وێ ئامارێ حوکمەتا بەغدا دبێژیت: رێژەکا مەزن یا گەنمی ھاتیە سۆتن و نەشێین وێ رێژێ ھەموویێ قەرەبوو بکەین، بەلێ دێ بزاڤێ کەین ھەموو ئەو جۆتیارێن گەنمێ وان سۆتی بھێنە قەرەبووکرن”.
گۆتژی: “جھێ داخێ یە ھەتا نوکە کەسەک نەھاتیە سزادان یان دەستەسەرکرن ئەو کەسێن گەنمێ جۆتیارێن کورد سۆتین، ژ بەرکو ھێزێن ملیشیات دەستھەلاتداریێ ل وان دەڤەرا دکەن، دگەل گروپێ داعش ئەو ب ڤی کاری دھێنە تۆمەتبارکرن، ئەگەر پێشمەرگە نەڤەگەڕیت دێ ئاستەنگێن مەزنتر کەڤنە پێشیا کوردێن ل وان دەڤەران دژین”.
جوان یونسێ ئاشکرا ژی کر، ل نێزیک رێکخراوا تیرۆرستی یا داعش دێ ل وان دەڤەرێن دەرڤەی دەستھەلاتا پێشمەرگەی سەرھەلدەت، ئەگەر رێگری ل وان شانەیێن نڤستی نەھێتە کرن یان پێشمەرگە نەڤەگەڕیتە وان دەڤەران.
