لیژنا به‌ره‌ڤانیا په‌رله‌مانێ به‌ریتانیا داخوازیێن هه‌رێمێ تۆماركرن
ئه‌ڤرۆ نیۆز:
شیره‌تكارێ جڤاتا ئاسایشا هه‌رێما كوردستانێ مه‌سرۆر بارزانى پێشوازى ل شاندێ لیژنا به‌ره‌ڤانیا په‌رله‌مانێ به‌ریتانیا ب سه‌رۆكاتیا(داى هاڤرد) كرد، دهه‌ڤدیتنه‌كێ دا كو قونسلێ گشتیێ به‌ریتانیا ل هه‌ولێرێ ئاماده‌بوو، به‌حسێ ره‌وشا عیراقێ و سوریا و گه‌فێن تیرۆرستێن داعشێ و هه‌لسه‌نگاندنا ژێده‌رێن له‌شكرێ و دارایى بۆ ژناڤبرنا چه‌كدارێن داعشێ هاتنه كرن.
زێدبارى وێ ئێكێ پیدڤیا دابینكرنا چه‌كێ قورس بۆ هه‌رێما كوردستانێ هاته به‌رچاڤكرن، ژ ڤى ئالى ڤه مه‌سرۆر بارزانى گۆت: ئه‌ڤه شه‌ره‌كێ جیهانى یه دژى تیرورستایه و تێكشكاندن و ژناڤبرنا ڤان گه‌فان پێدڤى ب به‌سڤه‌كا هه‌ڤپشك هه‌یه، هه‌روه‌سا خوه‌یاكر، مه به‌رى نها راگه‌هاندیه و جاره‌كا دى ژى دێ بێژین نابیت داعشێ چوو په‌نایێن خوه هه‌بن، له‌ورا دڤێت گورزێن ئه‌سمانى به‌رفره‌هتر بهێنه دانان.
د پشكه‌كا دیا وێ هه‌ڤدیتنێ دا شیره‌تكارێ جڤاتا ئاسایشا هه‌رێما كوردستانێ پشته‌ڤانى و هاریكاریا به‌ریتانیا بۆ هێزێن پێشمه‌رگه‌ێ هه‌رێما كوردستانێ ب بلندى نرخاند، دیاركر بۆ ژاڤبرنا داعشێ دڤێت چه‌كه‌كێ زێده‌تر دده‌ستێن پێشمه‌رگه‌ى دا هه‌بیت.
ژئالیێ خوه‌ڤه په‌رله‌مانتارێن به‌ریتانیا گۆت: هه‌موو پێدڤى و داخوزایێن هه‌رێما كوردستانێ د راپۆرته‌كێ دا هاتینه تۆماركرن و دێ هێنه بلندكرن بۆ جهێن په‌یوه‌ندیدار، هه‌روه‌سا دووپاتكرن به‌ریتانیا یا پیگیره ب پشته‌ڤانیا هه‌رێما كوردستانێ د شه‌رێ دژى داعشێ دا.
فوتو فرهاد ..
