ل ئاكرێ دووەم مەزنترین عەلوە ل سەر ئاستێ ئیراقێ و هەرێمێ دهێتە دروستكرن
دووڤچوون:
عەلوا ئاكرێ پرۆژەكێ مەزنێ وەبەرهێنانێیە بۆ پشتەڤانیا جۆتیاران دهێتە چێكرن و دهێتە هژمارتن دووەم مەزنترین عەلوە ل سەر ئاستێ ئیراقێ و هەرێما كوردستانێ كو ل سەر رووبەرێ 98 دۆنەمێن ئەردی دهێتە دروست كرن و بەرهەمێ جۆتیاران دێ تێدا هێتە كۆمكرن.
موزەفەر شاكر، رێڤەبەرێ وی پرۆژەی بۆ فەرمانگەها میدیا و زانیاری راگەهاند: “جوتیاران بەرهەمەكێ زۆر هەیە، ل جهێ هندێ كو بەرهەمێن وان ل هەولێر و مووسلێ و جهێن دیتر بهێنە ب بازار كرن، ڤێرێ دێ بۆ وان بیتە بازارەكێ سەرەكی بۆ بەرهەمێن وان.
زێدەتر گۆت: ئەو عەلوە ب 22 ملیۆن دۆلاران و ل سەر رووبەرێ 98 دۆنەمێن ئەردی دهێتە دروستكرن و بەرهەمێ جۆتیاران دێ تێدا هێتە كۆمكرن. عەلوە پێكدهێت ژ ساركەرەكێ، كۆگەهان، دوكانێن بازرگانی، خورانگەهان و عەلەفی.
