ل ئێكه‌تیا ئورۆپا دهێته خواستن شنگالێ ئاڤه‌دان بكه‌ن
ئه‌ڤرۆ نیوز:
نوونه‌رێ حوكمه‌تا هه‌رێما كوردستانێ ل ئێكه‌تیا ئورۆپا داخوازێ ژ ئێكه‌تیا ئورۆپا دكه‌ت كو پتر هاریكاریا هێزێن پێشمه‌رگه‌ى بكه‌ت و رۆله‌كێ باش د دوباره ئاڤه‌دانكرنا شنگالێ دا بگێریت و سه‌ركێشا وى كاروانێ ئاڤه‌دانكرنێ بیت و گۆت: “ئه‌م داخوازێ ژ ئێكه‌تیا ئورۆپا دكه‌ین ب پرۆژه بڕیاره‌كێ كاره‌ساتا شنگالێ ب جینۆساید بده‌ته نیاسین”.
وه‌كو خوه به‌رهه‌ڤكرن بۆ كۆمبوونا سالانه یا د ناڤبه‌را په‌رله‌مانێ عیراقێ و په‌رله‌مانێ ئێكه‌تیا ئورۆپا دا كو بڕیاره ل رۆژا 3/12/2015 ل باژێرێ برۆكسل یێ پایته‌ختێ به‌لژیكا ب به‌رهه‌ڤبوونا شانده‌كێ په‌رله‌مانێ عیراقێ بهێته ئه‌نجام دان، لژنا په‌یوه‌ندیێن عیراقێ ل په‌رله‌مانێ ئورۆپا كۆمبوونه‌ك د ناڤ په‌رله‌مانێ ئورۆپا دا ب به‌رهه‌ڤبوونا دلاوه‌ر خالد ئاژگه‌یى، نوونه‌رێ حوكمه‌تا هه‌رێما كوردستانێ ل ئێكه‌تیا ئورۆپا رێكخست.
دلاوه‌ر خالد ئاژگه‌یى، نوونه‌رێ حوكمه‌تا هه‌رێما كوردستانێ ل ئێكه‌تیا ئورۆپا د كۆمبوونێ دا ئاشكرا كر، هه‌رێما كوردستانێ نوكه پێگه‌هه‌كێ گرنگ ل سه‌ر ئاستێ ناڤخۆ و نێڤده‌وله‌تى دا هه‌یه و گۆت: “ئه‌م دخوازین د كۆمبوونێن سالانه یێن بهێن دا د ناڤبه‌را په‌رله‌مانێ عیراقێ و په‌رله‌مانێ ئورۆپا دا، شاندێ په‌رله‌مانێ كوردستانێ ژى به‌رهه‌ڤى وان كۆمبوونان ببیت”.
ده‌رباره‌ى ئالۆزیێن د ناڤبه‌را هه‌ولێر و به‌غدا ژى دا ئاژگه‌یى گۆت: “دڤێت ئێكه‌تیا ئورۆپا و ب تایبه‌ت په‌رله‌مانێ ئورۆپا رۆل د چاره‌كرنا ئالۆزیێن د ناڤبه‌را هه‌ولێر و به‌غدا دا هه‌بیت”.
