ل ئێكێ ئـەیـارێ چ جـۆرە پیرۆزبـاهییەك بۆ چینا كـرێكاران یـا گرنگە؟
دلهین حەمدی
هەر وەكی یا دیار هەر سال ئێكی ئەیارێ جەژن و ڕۆژا كرێكاران یا جیهانی یە و بیرۆكەیا ڤێ جەژنێ بۆ (٢١) نیسانا (١٨٥٦) ل وەلاتێ ئوستڕالیایێ ڤەدگەڕیتەڤە و پاشی گەهشتە وەلاتێ ئەمریكا، ئێكەم جار كو (١) ئەیارێ ب جەژنا كرێكاران هاتیە نیاسین ل سالا (١٩٨٢) یێ بوو ل باژێڕێ نیۆیۆرك ل ئەمریكایێ و ل وی وەختی كرێكاران ئەڤ جەژنە گێڕای و پشتی هینگی ئەڤ هەلكەفتە ل وەلاتێن جیهانێ ژی بەربەلاڤ بوو و ل وێ ڕۆژێ دا كرێكارێن لێزان و كاڕا و دەست ڕەنگین هاتنە خەلاتكرن و ڕێز لێ گرتن، هەلبەرت ئەگەرێ ناساندنا ڤێ ڕۆژێ وەك جەژنا كرێكاران بۆ نەڕازیبوونا كرێكاران ل ویلایەتا شیكاگۆ و ئەو چیرۆكا وان یا كو ئەم هەمی دزانین چاوا هاتبوو روودان.
ل پڕانیا وەلاتان چینا كرێكاران ب چینەكا لاواز و كێم دەرامەت و هەژار دهێنە ل قەلەمدان و هێزا وان هەمی د زەند و باسكێن وان دایە و ب هەمی هێزا خۆ ڕۆژانە كار دكەن داكو بشێن پاریێ ژیانێ بۆ خۆ و زارۆیێن خۆ دابین بكەن و د ماوەیێ كارێ خۆ یێ ڕۆژانە دا ژی تووشی گەلەك زۆری و زەحمەت و هەتا ئەگەرێ گیان ژ دەستدانێ ژی دبن، لەوڕا ب تنێ پیرۆزكرنا ڤێ ڕۆژێ ل چینا كرێكاران یا بەس نینە بەلكی دڤێت حوكمەت ب ڕێیا وەزارەتا كار و كاروبارێن جڤاكی و دەستەیێن تایبەت ب ڤێ چەندێ ڤە كار ل سەر مافێن كرێكاران بكەن و ب دروستی مافێن وان دەستەبەر بكەن و یا ژ هەمیان؛ گرنگتر دڤێت بیمەیا ساخلەمیێ ژی بۆ چینا كرێكاران بهێتە دابینكرن و حوكمەت مەزاختنێن وان یێن ساخلەمیێ و هەروەسا ڕێكارێن پاراستنا ژیانا وان د ماوەیێ كاری دا بۆ دابین بكەت سەرەڕای كێمكرنا باجێ ب هەمی جۆرێن خۆ ڤە ل سەر ڤێ چینا لاواز و زەرەرمەند، ل ڤێرێ ئەرك و فەرە ل سەر ملێن حوكمەتێ ل دەمێ كو كرێكارەك د ماوەیێ كاركرنێ دا ژیانا خۆ ژ دەستددەت خۆ ل خێزان و زارۆیێن ڤی كرێكاری بكەتە خۆدان و ئاسانكاری و خزمەتێن ژیانێ بۆ پێشكێش بكەت و مە ئاماژە پێ كر كو چینا كرێكاران چینەكا زەرەرمەند و بێ دەستهەلاتن و ژ هەژینە مافێن وان ب دروستی بهێنە دابینكرن و ڕۆژ و جەژنا كرێكاران ژی ل دەف وان بكەنە دو جەژن و جێبەجێكرنا ڤێ چەندێ مەزنترین و بهاترین پیرۆزباهی یە ژ لایێ حوكمەتێ ڤە بۆ چینا كرێكاران كو چینا پێشڤەبرنا شارستانیەتا وەلاتانە د هەر سەردەمەكێ دا.
