ل ئەمنا دهۆكێ سێ چار جاران من بزاڤا خوە كوشتنێ كریە چونكی مرن ژ وێ ژیانێ خوەشتر بوو
دیدار، سالار محەمەد دۆسكی:
زیندانیێ سیاسی فەرج مستەفا سەرحان، خەلكێ گوندێ زێوكا عەبو ل دەڤەرا دۆسكیا ل سالا 1965 ل دهۆكێ ژ دایك بابوویە، خواندنا سەرەتایی ل دهۆك ئەلئۆلا و ناڤنجی ل مەمێ ئالان و ئامادەیی ل برایەتی خوانداینە، پشتی هاتیە ئازادكرن قانوون سیاسە ل زانكۆیێ ب دووماهی ئینایە.
زیندانیێ سیاسی، فەرج مستەفا سەرحان، بۆ رۆژناما ئەڤرۆ گۆت: ل دەسپێكا سالێت هەشتێیان هاتمە رێكخستن ل گەل رێكخراوا (هەلەمەت) ل گەل لژنا ناوچا دهۆك و زێدەتر كارێ مە كومكرنا پێزانینان بوو و بەلاڤەكرنا بەلاڤووكان بوو، پشتی مە كارەكێ باش كری رێكەفتی 28/1/1983 هاتینە دەستەسەركرن، دەمێ دو هەیڤان ل ئەمنا دهۆك و هەشت هەیڤان ل ئەمنا گشتی یا رژێما بەعس دا ماین دووڤ دا هاتینە رەوانەكرن بۆ دادگەها سەورە و ل دیف مادێ (157) هاتینە سزادان ب حوكمێ هەتا هەتایێ دزیندانێ دا و رێكەفتی 14/8/1988 هاتینە ئازادكرن.
فەرجی گۆتژی: دەمێ رێكخستی كارێ مە كومكرنا پێزانینا بوو و ل سەر كەسێن ل گەل ئەمنێ كار بكەن و دیسا ئەو كەسێن ئەزیەت ژی گەهاندبا خەلكی مە پێزانین ل سەر كومدكرن و دەنگوباس گەهشتنە مە كو هندەك ل گەل ئەمنێ كار دكەن و هەمان دەم گەلەك زیانێ دگەهینە خەلكێ سڤیل چ ژنافبرنا رێكخستنێ یان گرێدایی كارێن رەوشتی بن وی دەمی مە بەرهەڤی كرن كو هوشداریەكێ بدەینە ئەوی كەسی یێ ڤی كاری دكەت، وی دەمی ئەمن یا هایداری كارێ مەبوو وئەڤجا نوزانین ژ ناف مە پێزانین گەهشت بوونێ یان ل دەرڤە و بڤی رەنگی هاتینە ئاشكەراكرن وی دەمی ئەم پێنچ بووین و هەر هەمی هاتینە دەستەسەركرن، هەڤالەكێ مە خەلكێ بەندا بوو هاتەسێدارەدان و هەڤالێت مە (رەشید خەلكێ زاخو، بەدیع شەمسدین، ئەحمەد سەعید كەمەكی، فەرج مستەفا سەرحان) دەمێ ئەمنێ گرتین ئەو ئینا سەرێ مە یا مێشكێ مرۆڤی قەبوول نەكەت و دەمێ هاتینەگرتن زفستان بوو خودێ ئەم ڤیاین هەكە دا ژ سارمادا مرین و ژ بلی قوتانێ و خوین چوونێ، دەمێ دقوتاین وی دەمی خودێ ژێ رازی (فارس عەبدوللا حەمو) ژوورا تەنشت مە بوو و پشتی چەند رۆژان برینە دەف رەحمەتی (فارس) وی گۆت ئەڤە هین ئەوێن هەوە ئەشكەنجەدان چەند رۆژە دخاری مە گۆتێ بەلێ گۆت باوەرناكەم هوین دساخن و مە قەد باوەر نەدكر هوون دێ ساخ مینن چونكی هەمی جورێن قوتانێ نەمان ل گەل مە نە بكارئیناین ژ كێبلا و دار و ئاسنان و فەلاقێ وكارەبێ، وی دەمی دەنگۆ هەبوو ئەم ل گەل هندەك دیلێن رژێمێ كو كەفت بوونە ددەستێ پێشمەرگەی بهێنە گوهورین و دووڤدا چێنەبوو ئێكسەر هاتینە ڕەوانەكرن بۆ ئەمنا گشتی ل بەغدا و هەشت هەیڤان بێی دادگەه ل ئەمنا گشتی ماین و قوتان هەبوو بەلێ نە وەك یا دهۆك بوو.
فەرج مستەفا هێشتا گۆت: پشتی هاتینە دادگەهكرن ل زیندانا (ئەبو غورێب) بەردەوام ئاخفتنێن كرێت دگۆتن و گەلەك جارا ئەو تشتێ دگۆت مە وەكی وانەدكر ئەم دقوتاین و رۆژەكێ مە خوین نەدابوو وی دەمی خوین دكێشا وەك پشتەڤانی بۆ شەرێ عیراق و ئیرانێ و مە ژی خوین نەدا و ئەم گەلەك بووین و پشتی گازی كریە مە و گۆت بۆ هەوە خوین نەدا مە گۆتێ مە خوین نینە وی دەمی ب هەمی شێوا دانا من ب كێبلا و قوتانەكا مەزن و گۆت ئاخفتنێن كرێیت بێژە (مسعود بارزانی و مام جەلال)ی بێژە (سەدان حسێن)ی من گۆتێ نا بێژم، گۆت دڤێت تو ئیمزا بكەی دێ چیە دادگەهێ و دێ هێیە سێدارەدانێ و من ژی ئیمزا كر و جارەكا دی قوتامە ڤە دووڤ دا دەرگەه ڤەكر و پێنەكا دی دانا من و گۆت هەرە و من نەزانی كیڤە بچم هندی قوتابووم.
هەمان زیندانیێ سیاسی گۆت: مە ئێكگرتنەكا مەزن دزیندانێ دا هەبوو و وەكی خیزانەكێ بووین و راستە هەر ئێك ل گەل پارتەكا سیاسی بوو لێ ئێشا مەهەمی یا ئێك بوو و ئەم وەك ئێك خێزان ل گەل ئێك دژیاین و مە هەمیا ئێك ئارمانج هەبوو، هزرێن مە هەمی دئێكگرتی بوون و ئێكگرتنەكا موكم مە هەبوو، گەلەك جاران مە حەزدكر مە ب كوژن و ب سوژن چونكە مە خوە ب خودانێ كێشەكا نشتیمانی و نەتەوەیی زانی و گەلەك جاران بێژم خوزی ئەڤێن شاشیا نوكە دكەن ئەگە زیندان دیتبا نوكە ئەو شاشی نەدكر، هەتا نوكە پێ منێ بریندارە و نەشێن بدورستی ب رێڤەبچم، دەمێ ل دەسپێكێ گرتین ل ئەمنا دهۆكێ زێدەتر ژ 10 سم بەفر ل عەردی بوو و ئەم ل سەر وێ بەفرێ بووین و ئاف ب مەدا دكر و دووڤ دا دقوتاین و ل ئەمنا دهۆكێ سێ چار جارا من بزاڤا خوە كوشتنێ كریە چونكە بوومن كوشتن ژ وێ ژیانێ خوەشتر بوو.
ناڤبری گۆت: هەمی بیرهاتن و جەژنێن ئاینی و نەتەوەیی مە ل زیندانێ ساخ دكرن و خوزی ئەو رەوشتێ وی دەمی نوكە ل دەف مە هەبایە نەبوو بێژی ئەف كەسە یێ برسی یە یان هەژارە و گەلەك جاران خێزانا كەسەكی نەدهات و رەنگە وی زێدەتر ژ من خوارن هەبوو و پتری من پارە هەبوون، هەڤالەكێ مە بابێ وی مربوو (40) رۆژان مە نەهێلا ئەو بزانیت.
فەرج مستەفا سەرحان دۆسكی، گۆتژی: ل سالا 1984ێ دەمێ رەحمەتی (مام جەلال) هاتیە خوارێ جەماعەتێن ئێكەتیێ هەمی هاتنە ئازادكرن و ئەم نە بەرداین ،ل 1986 لێبورینەكا دی دا و هەمی مادێن سڤ هاتنە ئازادكرن و بتنێ ئەم نەهاتینە ئازادكرن، ژ ئەنجامێ 5000 هزار مرۆڤان ئەم 400 نەماین، ل سالا 1988 مە نەزانی ئەنفالێن رەش دروست بووینە وی دەمی دەنگو هەبوو رەنگە لێبورینەكا گشتی هەبیت و مە بەردەوام چاڤدێری و گوهداری یا دەنگ و باسا دكر و دەمێ گۆتی لێبورینە مە باوەرنەدكر و دەمێ مە زانی راستە كەیفا مە هات لێ هەر دلێ مە یێ نەخوشە چونكە ژ عەرەب و ئێزدی یا نە گرت و پشتی رۆژا سیێ لێبورینەك بۆ عەرەبان دەركر و دیسا ئێزدی نەهاتنەدەركرن و ئەو ئێزدی مانە ل زیندانێ ڤە هەتا سالا 1995 هاتنە ئازادكرن، ئەم گەلەك هاتینە ئازادكرن و هندەك هاتنە ئازادكرن ل سالا 1979ێ نەهاتبوونە ئازادكرن و دەمێ مە زانی ئەنفالێن رەشێن چێبووین مە گۆت خوزی نەهتباینە ئازادكرن و سەدامی دڤیا ب ئازادكرنا مە خوە شرین بكەت و دیاربكەت كو نە دژی كوردانە چونكی زیندانیێن كورد ئازاد دكرن.
هێشتا گۆت: داخاز دكەین هەر كەسەكێ ئەشكەنجادان یان زیندان هەر تشتەك دیت بیت مافێ وی نەهێتە بەرزەكرن مادی و مەعنەوی و دیسا دا دپەروەری هەبیت، بێ ماندیبوون دیتی پێدڤی ب هندێ یە چاڤدان لێ هەبیت و هەمی تشت نە پارە یە، بلا كورێ مستەشارەكی ژی بژیت لێ نە ل سەر حسابا كەسەكێ وەكی مە ب سالان زیندان و ئەشكەنجەدان دیتی و بەری دەمەكی دەنگۆ هەبوو دێ سەدام زڤریت و گەلەكێن نانێ وی خاری حەز دكر بزڤریتە ڤە چونكی فێری وی سیستەمی ب بوون و نەڤێت چاكسازی و ماف و ئەرك هەبن.
