ل بارەگایێ فرقا زاخۆ یا لەشكرێ ئیراقێ سێ هەیڤان ئەز دئەشكەنجە و قـوتانێ دا بووم
هەڤدیتن: رەمەزان دەشتمری/ زاخۆ
6-6
ل ئەوێ رۆژێ ئەز ل ئەوی نزارێ گوندێ شیلانێ دا مام هەتا ڕۆژ چوویە ئاڤا و من دا ڕیكێ و ئەز بۆ گوندێ شیلانێ هاتم و گەهشتم بۆ گوندێ شولینێ و ل دەمێ سپێدێ دگەل دونیا زەلالبینێ ئەز گەهشتم بۆ پشتا گوندێ سویلێ ل دەمێ رۆژهەلاتنێ ل بن كەڤرەكێ دا خوە دا هەشارێ و ل ئەوێ رۆژێ ل بن ئەوی كەڤری دا مام. هەتا رۆژئاڤابونێ ئەز گەهشتم پشتا گوندێ ئیكمالێ و من بەرێ خوە دایێ دوو چەكدارێن جاش ل ڕەبیەكێ هاتن خوار و ل بنێ نهالێ ئاگرەك هەلكرن و بۆ ڕەبییا دیتر چوون. ئەز ڕابووم من پێلاڤا خوە یا ژ جورێ میكاب ژ پێ خوەكر، و من پێنج جوتێن گورا كرنە پێ خوە و پیلاڤا خوە كرە دجانتێ خوەدا و هیدێ هیدێ ئەز ل سنوری دەربازبووم و بۆ گوندێ مەرگەهێ چووم. ل دەمژمێر دوازدەیی شەڤێ ئەز بۆ گوندێ مەرگەهێ گەهشتم و من قەستا مالا دوستێ مە سالح مەرگەهی كر، و ئەوان هەر ئەوێ شەڤێ تڤەنگا من و دگەل ساجور و كەل و پەلێن من ڤەشارتن و من ل مالا ئەوی شیڤخوار و ل رۆژادیتر من سەرێ خوە ژی شویشت و سەر و ڕهێن خوە تراشین و هەتا ئیڤارێ دوستێ تێ من سالح جابا موختارێ گوندێ مەرگەهێ هنارت و هات و ئەز دگەل خوەبرم و ڕادەستی قەرەقولا لەشكرێ توركیا كرم. دەمێ ئەوێ قەرەقولێ ئەز وەرگرتیم و هەر ئێكسەر ئەز زیندانكرم. ڤێجا دا ب شەڤێ من زیندان كەن و ب ڕۆژێ دا من بەنە سەر سنوری و دبێژنە من: ل ڤێرێ ڕاوەستە هەتا بریار بۆمە بێت. پشتی سێ ڕۆژان ئەز ژ زیندانێ بەردام و من دگەل لەشكری خوارن دخوار و جار جاران ئەز ب تنێ بۆ ناڤ گوندێ مەرگەهێ دهاتم. پاشی ئەز بۆ بیلیكێ ئانكو فەوجا لەشكری ل گوندێ بێجوهێ هنارتم و ل وێرێ ئەز چوم گوندێ بێجوهێ ل مالا كەسەكی نیاسێ مە ناڤێ وی سیسۆ بوو و هەتا ماوێ دوو هەیڤ بورین و پاشی بریاڕ هاتەدان ئەز بۆ قایمقامیا قەزا قەلابا(ئولودەرە) بێم ڤەگوهاستن.
ئەوبوو سیسۆی و دگەل كەسەكی دیتر دگوتنێ: درباز خەلو دگەل من هاتن و ئەز بۆ لایێ قایمقامی هنارتم. دەمێ ئەم گەهشتین بۆ دەف قایمقامێ قەزا قەلابا و خێرهاتن ب مەكر، و گوت: تاهر بۆ ماوێ چەند ڕۆژێن دیتر ل دەفمە بت هەتا ئەم ئەوی بۆ كەمپا ئامەدێ ڤرێكەین، و یانژی هەكەر هەوە پارە هەبن هوین دشێت ل سەر كیستێ خوە بچن. ب ڕاستی دڤێت چ جاران مرۆڤ قەنجیا ئەڤان هەردو كەسان درباز خەلو و سیسۆیی ژبیرنەكەین، ئەوان هەردویان پێكڤە ب زمانێ توركی گوتنە قایمقامی هەر تو فەرمانێ بدەیی ئەم دێ ئەوی ل سەر كیستێ خوە بۆ كەمپا ئامەدێ هنێرین. پاشی مە ترۆمبێلەك تەكسی ب كرێ گرت و پولیسەك دا دگەل من هات و ئەم بۆ كەمپا ئامەدێ یا پەنابەران هاتین. ل دەمژمێر سیێ ئیڤاری ئەم گەهشتین ناڤ چادرێن كەمپێ و ڕادەستێ ئیدارا كەمپێ كرم و من بەرێ خوەدایێ هەمی برا و كەس و كارێن من یێ چاڤەڕێ هاتنا منن و مە خوە هاڤێت ئێك و هەمبێزكرن و ب كەیف خوەشی ئەز گەهشتم بۆ ناڤ خێزانا خوە ل ناڤ چادرێن كەمپا ئامەدێ دا و خێزان و زاروكێن خوە شادبیم.
هەر وەسا پێشمەرگەیێ شۆڕشا گولانێ تاهر سەعدوللا بارهولی بەردەوامی دا ئاخفتنێن خوە و گوت: ڤێجا دەمێ هەڤالێن من گەهشتین سەر سنوری و كەس و كارێن مە پرسیارا من ژ ئەوان كرین. ئەوان گوت: ب شەڤێ ل پشتا كانیا گوندێ شیلانێ ئەم یێن ژێك ڤەقەتیاین و مە خوەب دەرد و بەلا هەتا مە شیا خوە ژناڤ لەشكرێ حكومەتا ئیراقێ دا قورتال بكەین. و ب راستی هەڤالێ مە تاهر ساخ بت و یان مری ئەم چ تشتی ژێ نزانین؟. ل ڤێرێ مالا مە تازیا من دەینان و وەسا تەخمین دكرن كو ئەز یێ هاتیم شەهیدكرن. بەلێ پشتی خێزان و كەس و كارێن مە هاتین بۆ كەمپا ئامەدێ ژنەكا مروڤا مە ناڤێ وێ وەسیلا كەریم بی ئەو ژی توشی نەخوشیەكێ ببی و مابی ل گوندێ بێجوهێ دەمێ ئەو ساخبی و پاشی بۆ ناڤ كەمپێ هاتی و گەهشتی خێزانا خوە. ڕۆژەكێ برایێ من موسلح دچیتە مالا وەسیلایێ و پرسیارا حالێ وێ و ساخلەمیا ئەوێ دكەت. وەسیلا ژی پرسیارا من دكەت و دبێژیتە برایێ من موسلحی هوین چ ژ تاهری چ دزانن؟ برایێ من موسلح دبێژیتەە وەسیلایێ : مانێ تاهر یێ هاتی شەهیدكرن و مە بەهیا ویژی یا دەینایی و تازیا ویژی یاكری؟ وەسیلا ژی هوو جرڤەك ڤێ دگەڤت و دبێژیتە موسلحی شەهیدبوونا چی و تاهر و شەهیدبوون و بەری سێ رۆژان ل مالا سیسۆیی من بالاڤا تاهری یا كری، و جلكێن وی یێن شویشتین و نوكە ئەو یێ ساخە و یێ ل بیلیكا گوندێ بێجوهێ و ل دەڤ جەندەرمان و یێ ل هیڤیا فەرمانا حكومەتێ یە ئەوژی بۆ كەمپێ ڤەگوهێزن. دەمێ ئەڤێ ژنا مروڤا مە وەسیلایێ ئەف سوحبەتە بۆ برایێ من موسلحی كرین هەر ئێكسەر برایێ من موسلح برایێ شەوكەت و پسمامێ من شەهید بەهجەت بۆ لایێ بنگەهێ پولیسا چون و بابەت ئەو ئیدارا كەمپێ گوتن. پشتی ئەوان پەیوەندی ب بویلیكا لەشكری یا گوندێ بێجوهێ كرین و پرسیارا من ژ ئەوان كرین كو ئەوان گوتن: بەلێ ڕاستە تاهر یێ ل دەف مەیە و ئەڤە ئەم دێ بۆ هەوە ڤێرێ كەین. ل ڤێرێ ژنویكا كەیف خوەشی بۆ مال و كەس و كارێن مە پەیدابی و كو پشتی بورینا شێست و حەفت ڕۆژان ژكەس و كارێن خوە ڤەقەتیایم ومن ژنوی زانین كو ئەز یێ ساخم و نەهاتمە شەهیدكرن.
ئەوبوو ل هەیڤا یازدە سالا 1988ی ئەم ژ ناڤ جادران ژ چەمێ ئامەدێ بۆ ناڤ شوقەیان ڤەگوهاستن و مە ڕۆژانێن خوە ل ناڤ كەمپا ئامەدێ ب پەنابەری بوراندن، هەتا سەرهلدانا بهارا سالا 1991ی ئەم ب خێزان ڤە مە قەستا هەرێما كوردستانێ كر و من بەردەوامی دا خزمەتا پێشمەرگایەتیێ و ئەركی من دگەل لیژنا ئەمنی و بارەگایێ لیژنا ناوچا زاخۆ و پاشی بۆ سوپایێ ئێك هاتم ڤەگوهاستن بەردەوام بیم ل سەر خزمەتا پێشمەرگایەتیێ هەتا سالا 2007ی و ل دویڤ بڕیارا وەزارەتا پێشمەرگەیی ب پلەیا میلازم هاتم خانەنشینكرن. ب راستی ئەژی وەك پێشمەرگەیەكی دێرین هەژی ب بەحشینا مەدالیا بارزانی مە ژبەر كو منژی هەمی ژیێ خۆە ب دەردەسەری و نەخوەشی و ل ناڤ چول و چیاندا خزمەتا شۆڕشێ و پارتی كریە.
