ل دهۆكێ دەهـ یانە شەڕی بۆ كۆپا ئیراقێ دكەن و چو نوونەرێن پارێزگەهێ پشكدار نینن
دوهی ل هۆلا گرتیا كولیژەیا پەروەردەیا چەستەیی و زانستێن وەرزشی ل زانكۆیا دهۆك هەڤڕكیێن كۆپا ئیراقێ بۆ یاریا فۆتسالێ ل سەر ئاستێ یانەیان بۆ تیمێن كچان دەستپێكر، ب پشكداریا دەه یانەیێن ئیراقێ و ئێكا هەرێما كوردستانێ و چو یانەیێن پارێزگەهێ د ناڤ دا نینن، یاریێن وان دێ ب شێوەیێ خول ئێك قۆناغ ل سەر دو كۆمان هاتینە بەلاڤكرن بڤی رەنگی:
كۆما ئێكێ: ئافرەتێن هەولێر، تلسقۆف، جەویە، رافیدەین و بیلادی.
كۆما دویێ پێكهاتینە ژ زەورا، قەرەقۆش، سیناعات كارەبا، ئال بدێر و شەهربان.
رۆژانە چار یاری دێ هێنە ئەنجامدان هەتا قۆناغا كۆمان ب دووماهی دهێت، دو تیم ژ هەر كۆمەكێ دێ دەربازبیتە چارگۆشەیا زێرین، یاریا دووماهیێ دێ ل 25ێ ڤێ مەهێ هێتە كرن.
د ئێكەم یاریا خوە دا نوونەرا كوردستانێ ئافرەتێن هەولێرێ قارەمانا خولا كوردستانێ شیا پێنگاڤا ئێكێ بۆ ناسناڤێ ئیراقێ ب سەركەفتیانە پاڤێژیت پشتی دگەل كچێن تلسقۆف ب22 گۆلان بێ بەرانبەر سەركەفتن ئینایی ژوانا 10 گۆل یێن ستێرا كوردستانێ گۆلكەرا تیما وان شۆخان نورەددین بوون.
یاریێن گەڕا دویێ، كۆما ئێكێ: ئافرەتێن هەولێر- بیلادی ل دەمژمێر 12:30 نیڤرۆ، جەویە- رافیدەین 2:30 نیڤرۆ، كۆما دویێ: قەرەقۆش- زەورا 4:30 ئێڤاری، سیناعات كارەبا- شەهرەبان 6:30 مەغرەب هێتە كرن.
بۆ زانین بڕیاربوو دو یانەیێن پارێزگەها دهۆكێ پشكداریێ بكەن ئەو ژی ئافرەتێن یانەیا دهۆك و تیما فۆتسالا یانەیا زاخۆ، ل دووڤ داخویانیێن وان ژبەر ئەگەرێن نەبوونا پشتەڤانیێ و چوونا كۆمەكا باشترین یاریزانێن پارێزگەهێ بۆ ناڤ رێزێن یانەیێن دی یێن ئیراقێ بۆ ئەگەر خوە ژ كۆپا ئیراقێ ڤەكێشن.
