ل دهۆكێ ناڤێن ده‌هان ئه‌نفالكرى وزیندانیێن سیاسى نه‌هاتینه تۆماركرن
ئه‌ڤرۆ نیوز:
هژماره‌كا كه‌سوكارێن قوربانیێن زیندانا سیاسى وئه‌نفالكریێن ب ده‌ستێ رژێما به‌عس یا ژناڤچووى، ل پارێزگه‌ها دهۆكێ 30 ساله چاڤه‌رێ قه‌ره‌بووكرنێ ژ به‌غدا دكه‌ن، به‌لێ هێشتا ناڤێن وان وه‌كو كه‌سوكارێن قوربانیێن زیندانیێن سیاسى وئه‌نفالكریان نه‌هاتینه تۆماركرن.
رێڤه‌به‌ریا كاروبارێن شه‌هید وئه‌نفالكریان ل دهۆكێ، ل دووڤ كوردستان 24، ئه‌گه‌رێ ڤێ چه‌ندێ بۆ نه‌بوونا فۆرمان دزڤرینیت ورادگه‌هینیت” وان به‌رده‌وام بزاڤ كرینه ڤێ دۆسیێ ب ڤه‌گوهێزن وبچیته ب سه‌ر به‌غدا ڤه، نوكه ژى هه‌موو پێرابوونێن قانوونى یێن تمام بووین”.
نه‌جلا عه‌لى، كو ئێكه ژ قوربانیێن ده‌ستێ رژێما به‌عس و12 كه‌س ژ مالباتا وێ هاتینه ئه‌نفالكرن بۆ كوردستان 24 دبێژیت” ده‌مێ دو سالایه سه‌ره‌دانا رێڤه‌به‌ریا شه‌هید وئه‌نفالكریان دكه‌م، بۆ وێ چه‌ندێ مافێ من نه‌هێته به‌رزه‌كرن ودمن دڤێت یان وه‌كو قوربانیا ده‌ستێ رژێمێ یان ژى وه‌كو زێندانیا سیاسى بهێمه هژمارتن، به‌لێ وه‌كو ئاماژێ بۆ دكه‌ت، ژبه‌ر نه‌بوونا فۆرمان، هه‌تا نوكه ناڤێ وێ ل رێزا قوربانیان نه‌هاتیه تۆماركرن”.
د ده‌مه‌كى دا كو ل پاریزگه‌ها دهۆكێ هێشتا هژماره‌كا مه‌زن یا قوربانى وزیندانێن سیاسى یێ هه‌ین، كو ناڤێن وان نه‌هاتینه تۆماركرن وده‌مه‌كێ درێژه چاڤه‌رێ گه‌هشتنا فۆرمان دكه‌ن، به‌ره‌ڤان حه‌مدى بریكارێ وه‌زاره‌تا كاروبارێن شه‌هید وئه‌نفالكریان ل هه‌رێما كوردستانێ دبێژیت” نوكه 9 هزار فۆرم یێن گه‌هشتینه سنورێ پارێزگه‌ها دهۆكێ، بۆ تۆماركرنا ناڤێن وان قوربانیێن كو هه‌تا نوكه مامۆلێن وان ب هه‌لاویستى ماین”.
ده‌مه‌كێ درێژه وه‌زاره‌تا كاروبارین شه‌هید وئه‌نفالكریان ب رێیا لژنه‌كێ بزاڤێ دكه‌ت حوكمه‌تا عیراقێ نه‌چار بكت قه‌ره‌بوویا زێان ڤێكه‌فتیێن ده‌ستێ رژێما به‌عس بكه‌ت، سه‌رۆكێ لژنا دانوستاندكارا وه‌زاره‌تا ناڤبرى ( مام ره‌سول) دبێژیت”پرسا ڤه‌گوهاستنا دۆسێیا زیندانیێن سیاسى بۆ سه‌ر حوكمه‌تا فیدرال یا ب دووماهى هاتى وهه‌موو پێرابوونێن قانوونى یێن ده‌رباز كرین”.
