ل دووماهیا ئهڤ ساله رێكخراو دێ خۆ ژ عیراقێ ڤهكێشن
سهرۆكێ لیژنا كۆچ و كۆچبهران ل پهرلهمانێ عیراقێ دیار كر:” مهترسیهكا مهزن ههیه ل دووماهیا ئهڤ ساله ژبهر خۆ ڤهكێشانا رێكخراوان ژ عیراقێ و مانا ئاواران ل ههرێما كوردستانێ بارگرانیهكا گهلهك مهزن ل سهر حكومهتا ههرێما كوردستانێ دروست بیت و پێدڤیه بهغدا بێدهنگ نهمینیت و ههڤكاریا ئاواران بكهت”.
دهۆك، لهزگین جوقی
شهریف سلێمان، سهرۆكێ لیژنا كۆچ وكۆچبهران ل پهرلهمانێ عیراقێ بۆ رۆژنامهیا ئهڤرۆ دیاركر: “رێكخراوێن خێرخوازی یێ خۆ ژ عیراقێ ڤهدكێشن، هندهك رێكخراو نهماینه و چووینه ئوكرانیا و وهلاتێن بیانی و ل دووماهیا ئهڤ ساله ژی ئهو رێكخراوێن كارێن خێرخوازی دكهن نامینن و دێ خۆ ژ عیراقێ ڤهكیشن، لهورا ژی مه داخواز كریه حۆكمهتا عیراقێ وێ ڤالاتیێ پر بكهت، ژبهركو ههتا نوكه ئاوارێن عیراقێ ل ههرێما كوردستانێ ماینه.
پیر دهیان، رێڤهبهرێ كۆچ و كۆچبهران و بهرسڤدانا قهیرانا ل پارێزگهها دهۆكێ دیار كر:” دهمێ رۆژا 16/11/2022ێ سهرۆك كومارێ عیراقێ سهرهدانا كهمپا شاریا یا ئاوارێن شنگال ل پارێزگهها دهۆكێ كری، دهزگای خێرخوازی بارزانی رۆنكرنهك دا سهر ههموو كهمپێن دهۆك و ههموو كێماسی هاتنه رۆنكرن و ڤهكێشانا رێكخراوێن خێرخوازی ژی هاته بهحسكرن بۆ سهرۆك كۆمارێ عیراقێ و داخواز هاته كرن عیراق ههڤكاریا ئاواران بكهت و چهند داخوازی ئاراستهی سهرۆك كۆماری هاتنه كرن ژ وان ژی رێكهڤتنا شنگال بكهڤته د وارێ بجهئینانێدا و كهسێن چهكدار دناڤ شنگالدا نهمینن و پولیسن فیدرال د شنگال دا بن و ههتا نوكه نیڤ ملیۆن ئاواره ل دهۆك ماینه نهشیاینه ڤهگهرن “.
