ل دھۆکێ پێکئینانا خێزانێ 50% کێمتر لێ ھاتیە

ئه‌ڤرۆ نيوز:

رێڤەبەرێ رێکخستنا پلێتێن ئاھێن خوارنێ ل پارێزگەھا دھۆکێ راگەھاند، ژ بەر قەیرانا دارایی نھا پێکئینانا خێزانێ و داخوازیا چێکرنا پلێتێن نوو یێن ئاھێن خوارنێ گەلەک کێمتر لێ ھاتیە ژ سالێن بەری نھا کو پترە ژ رێژا 50%.
حسێن سەبری، رێڤەبەرێ رێکخستنا پلێتێن ئاھێن خوارنێ بۆ ئەڤرۆ دیار کر، ھەتا دووماھیا سالا 2013، وان وەکو رێڤەبەریا رێکخستنا پلێتێن ئاھێن خوارنێ ل پارێزگەھا دھۆکێ ھەیڤانە پتر ژ 800 مامەلێن جودابوونێ ب رێڤەدبرن و ھەیڤانە 800 پلێتێن نوو بۆ خێزانێن ژ نوو دھاتنە پێکئینان دھاتنە چێکرن، بەلێ نھا ژ بەر قەیرانا دارایی، ئەڤ رێژە ل کێمیێ دایە و نوکە ھەیڤانە ئەم نێزیکی 300 مامەلان ب رێڤە دبەین.
ناڤبری دیار کر کو ل گۆرەی رێنمایان، ھەردو سالان جارەکێ پلێتێن نوو یێن ئاھێن خوارنێ دھێنە چاپکرن و نھا پلێتا سالا 2014 و 2015 ب دووماھی ھاتیە و ئەڤە سالا 2016 ژی ب نیڤی بوو، ھێشتا پلێتا سالا 2016 و 2017 نەگەھشتیە، ڤێ چەندێ ژی کارتێکرن ل سەر کارێ وان و مامەلێن وەلاتیان کریە.
ناڤھاتی ئاماژە ب وێ چەندێ ژی کر، نھا ل پارێزگەھا دھۆکێ ملیۆنەک و 80 ھزار کەس ھاتینە تۆمارکرن و پلێتێن ئاھێن خوارنێ بۆ وان ھاتینە چێکرن، نێزیکی ملیۆنەک و 200 ھزار کەسێن ئاوارە ژی ھاتینە تۆمارکرن، ھەروەسا یێن ل دەڤەرێن نوو رزگارکری ئاکنجی و گۆت: “ژ ڤی سەرجەمی نێزیکی 700 ھزار ئاوارەنە، نھا دو ملیۆن و 300 ھزار ل پارێزگەھا دھۆکێ ئاھێن خوارنێ وەردگرن”.

کۆمێنتا تە