ل دۆر دستوورێ عیراقێ یاداشتنامه‌ك بۆ سه‌رۆك بارزانى و سیستانى دهێته ئاراسته‌كرن
ئه‌ڤرۆ نیوز:
به‌رپرسه‌كێ وه‌زاره‌تا ئه‌وقاف وكاروبارڤین ئاینى ل هه‌رێما كوردستانێ ئاشكراكر كو ل دۆر راستڤه‌كرنا چه‌ند برگێن دستوورێ عیراقێ، یاداشتنامه‌ك هاتیه ئاراسته‌كرن بۆ سه‌رۆك مه‌سعود بارزانى وعه‌لى سیستانى وه‌كو دو كاریگه‌رترین كه‌سایه‌تى ل سه‌ر ئاستێ عیراقێ.
مه‌ریوان نه‌قشبه‌ندى، به‌رپرسێ په‌یوه‌ندیێن وه‌زاره‌تا ئه‌وقاف وكاروبارێن ئاینى ل هه‌رێمێ د داخۆیانیه‌كا رۆژنامه‌ڤانى دا گۆت” بۆ جارا سیێ یه 25 كه‌س ل سه‌ر ئاستێ عیراقێ كوربه‌نده‌كى بۆ چاكسازیێ د هنده‌ك برگێن دستوورێ عیراقێ دا ئه‌نجام دده‌ن كو په‌یوه‌ندى ب پرسا ئازادیا تاكێ عیراقى و وه‌لاتیبوونێ هه‌یه، پشكه‌ك ژى په‌یوه‌ندى ب ئاینێن جودا ڤه هه‌یه كو ل سه‌رانسه‌رى عیراقێ گورانكارى تێدا بهێنه ئه‌نجامدان، ئه‌ڤه ژى دێ بیته پرۆژه‌ك وهێته بلندكرن بۆ هه‌رسێ سه‌رۆكایه‌تیێن عیراقێ وهه‌رێما كوردستانێ”.
گۆت ژى” ئه‌و پرۆژه‌یه دێ هێته ئاراسته‌كرن بۆ هه‌ر ئێك ژ سه‌رۆك بارزانى وعه‌لى سیستانى وه‌كو دو مه‌رجه‌عێن خه‌لكى ل عیراقێ”.
گۆت ژى” ئه‌و مادێن په‌یوه‌ندى ب بابه‌تێ مافێ وه‌لاتیبوونێ وئازادیا گشتى ڤه هه‌ى، ب تایبه‌تى ژى ئه‌و برگه‌یا دبێژیت(نابیت چو قانوونه‌ك ده‌ربچیت به‌رۆڤاژى شه‌ریعه‌تا ئیسلامى بیت) و (چو قانوونه‌ك ده‌رنه‌چیت بێ ل به‌رچاڤ وه‌رگرتنا مافێن مرۆڤى) كو جۆره تێكهه‌لیه‌ك تێدایه وپێدڤیه ده‌ستكارى تێدا بهێته كرن ل گه‌ل چه‌ند پرسێن سیاسى ژى، بۆ نموونه ل بابه‌تێ بكارئینانا هێزێ وه‌كو چاوان پشتى ریفراندۆمێ مه دیتى هێز بۆ كوردستانێ هاتیه لڤین”.