ل دێرالۆك پرۆژه‌یێن بچووك یێن چاندنێ ب گه‌نجان دهێنه دان
ئامێدیێ، مه‌حمود نهێلی:
پتر ژ 100 گه‌نجان پشكداریێ د چه‌ند خولێن چاندنێ دكه‌ن بو وێ یه‌كێ 30 ژ وانا ببنه خودان پرۆژه و كار و پشكدار بوویی ژی دبێژن تا راده‌یه‌كی باش مفا ژ ڤان خۆلان وه‌رگرتیه. دناڤ ڤان 100 پشكدار بوویان دا دێ 30 ژ وانا بنه خودان پرۆژه، ئانكو ئه‌ڤ رێكخراوه دێ كه‌ره‌سته و كه‌ل و په‌لان بۆ دابین كه‌ت و هه‌موو مه‌زاختیێن وی پرۆژه‌ی دێ ل سه‌ر ڤێ رێكخراوێ بن.
نیبار شینو رێڤه‌به‌رێ راهێنانێن پیشه‌یی ل دهۆكێ بۆ رۆژناما ئه‌ڤرۆ دیار كر، ل دێره‌لۆكێ پتر ژ 38 گه‌نجان پشكداری د سێ خولێن چاندنێ دا كریه كو پتریا وان خه‌لكێ خوجهێ ده‌ڤه‌را ئامێدیێ نه، زێده‌باری چه‌ند گه‌نج ل كه‌مپا داوودیێ دهێن و پشكداری تێدا كریه.
ناڤهاتی دیار كر، ئه‌ڤ پرۆژه یێ رێكخراوا (AVSI) یا ئیتالی یه كو ئه‌ڤه كارێ وان یێ دوویێ دگه‌ل مه دا وه‌ك رێڤه‌به‌ریا راهێنانێن پیشه‌یی ل دهوكێ و ب هه‌ڤكاری ل گه‌ل رێڤه‌به‌ریا چاندنا دهۆكێ ئه‌نجام دده‌ن و یا ئێكێ ل دهۆكێ بوون و ئه‌ڤجا چار خۆل ل دهوكێ و سێ ژی ل دێره‌لۆكێ ڤه‌كرینه ل سه‌ر چاندنا كڤاركا و كه‌سكاتی و هه‌روه‌سا چاندنا گولان و گۆت: مه ل به‌ر وێ یه‌كێ شیره‌تكاریا چاندنا دێره‌لۆكێ هه‌لبژارتیه، چونكو ده‌ڤه‌ر یا گونجایه بۆ سه‌قای و هه‌روه‌سا دكه‌ڤیته ناڤه‌راستا ده‌ڤه‌رێ و هاوولاتی دشێن پشكداریێ تێدا بكه‌ن.
و ئاشكرا كر، خالا گرنك د ڤان خۆلان دا ئه‌وه ئه‌ڤ گه‌نجه دێ چاوا شێت بیته خودان كار یان ژی دێ شێت بۆ خوه پرۆژه‌یه‌كی دانیت و دێ چاوا پلانێ رێك ئێخیت و گۆت: ئه‌ڤ پشكداره دێ بیته خودان ده‌سته‌به‌را كومه‌لاتی كو سوبه‌هی دشێت ل هه‌ر جهه‌كی كار بكه‌ت دا كو ماف و ئه‌ركێن خوه بزانن و خالا دووماهیێ ژی سلامه‌تیا پیشه‌یی، چونكو وه‌رشا چاندنێ ژی مه‌ترسیا ل سه‌ر ساخله‌میا جوتیاری و خودان كاری هه‌ی وه‌ك ده‌رمانێن چاندنێ و كه‌ره‌سته‌یێن دهێنه ب كارئینان.
ژلایێ خوه ڤه ئێك ژ پشكداران ب ناڤێ ره‌جه‌ب نه‌عمان خه‌لكێ ناحیا شێلادزێ دیار كر، ده‌ڤه‌را وان ده‌ڤه‌ره‌كا چاندنێ یه و گۆت: مه ژ به‌ر وێ یه‌كێ دڤیا پشكداریێ د ڤان خۆلان دا بكه‌ین بۆ وێ یه‌كێ ببینه خودان كار و بشێن چاندنێ ل قوناغه‌كێ ببه‌ینه قوناغه‌كا دیتر ل دووڤ رێنمایێن زانستی.
و ئاشكرا كر، وی گه‌له‌ك مفا ژ ڤان خۆلان وه‌رگرتیه و شیاینه چه‌ند جۆر و ته‌خێن چاندنێ بناسن و بزانیت یێ كیش وه‌رزیه و كیش جۆرێ ئاخێ بۆ كیش جۆرێ چاندنێ یێ گونجایه و گۆت: به‌ری نوكه ژی من كارێ چاندنێ كریه و من به‌ره پشتی ئه‌ز ڤێ خۆلێ ب داوی ژی دئینم ده‌ست بكارێ چاندنێ ب رێكا پرۆژێن بچووك بكه‌م و ل دووڤ ستانده‌رێن زانستی و گونجایی.
ئه‌ندازیار ستار خورشید به‌رپرسێ شیره‌تكاریا چاندنا دێره‌لۆكێ و ئێك ژ ماموستایێ خۆلێ بۆ رۆژناما ئه‌ڤرۆ دیاركر، ئه‌و وانا تیۆری و هه‌روه‌سا پراكتیكی پێشكیشی ڤان پشكداربوویان دكه‌ت و گۆت: ئه‌م وه‌ك شیره‌تكاریا چاندنێ ل دێره‌لۆكێ پشكدارین دگه‌ل دا و باخچێ خوه یێ فه‌رمانگه‌هێ مه پێشكێشی رێكخراوێ كریه و خانیێ پلاستیكی دناڤ دا چێكریه بۆ وێ یه‌كێ گه‌نجێن مه یێن ده‌ڤه‌رێ پشكداریێ تێدا بكه‌ن و ل پاشه‌رۆژێ ببنه خودان پرۆژه و خودان كارێ خوه‌یێ تایبه‌ت و ئه‌ڤ گه‌نجه و ڤان جوتیاران مفایه‌كی باش ژێ وه‌رگرتیه و هیڤیدارین پرۆژێن وان سه‌ر بگرن و ببنه خودان كار.
