ل رۆژهەلاتا ناڤین چو تشتەک وەکو بەرێ نامینیت
بسپۆرەکێ پەیوەندیێن نێڤدەولەتی دیار دکەت هەکە رێککەفتن د ناڤبەرا ئەمریکا و ئیرانێ دا بهێتە کرن دێ گەلەک تشت ل دەڤەرێ هێنە گوهۆڕین و ئێدی ل رۆژهەلاتا ناڤین چو تشتەک وەکو بەری نها نابیت و هێزێن سیاسی ل دەڤەرێ ڤێ یەکێ باش دزانن.
د. ئەردەشیر پشەنگ بسپۆرێ کاروبارێن سیاسی کو ب ئەسلێ خوە کوردە بۆ مالپەرێ فەراتاب دیار کر، شەرێ چهل رۆژان یێ د ناڤبەرا ئەمریکا و ئسرائیلێ ل گەل ئیرانێ دا گەلەک تشت دانە گوهۆڕین، بەری هەر تشتەکێ گەلەک کەسان وەسا هزر دکر دێ ئیران ژی وەکو ئیراقێ و سووریێ لێ هێت، لێ دەرکەفت ئیران نە ئیراقە و نە ژی سووریا، ئانکۆ ئیرانێ تایبەتمەندیا خوە یا جودا هەیە و ل ئالیێ دی هەرچەندە شەڕ هاتە راگرتن، لێ کاریگەریێن شەڕی دێ هەتا چەندین سالێن دی ژی بەردەوام بن.
ناڤهاتی ئەو یەک ژی دیار کر، گەلەک پرس هەنە کو دڤێت ل ئیرانێ بهێنە چارەسەرکرن، دڤێت ئیران سەرەردەریا خوە ل گەل کوردان و نەتەوەیێن دی بگوهۆڕیت، گەلەک گرنگە ئیران ل گەل کوردان دەست ب قووناغەکا نوو بکەت، چونکی دڤێت بەرپرسێن ئیرانێ ڤێ راستیێ قەبوول بکەن کو پرسا کوردی و پرسا نەتەوەیێن دی یێن کو ل ئیرانێ دژین دڤێت بهێتە چارەسەرکرن، هەتا ئەو یەک نەهێتە کرن دێ ئالۆزی بەردەوام بن و گۆت: (هەکە رێککەفتنەکا باش ل گەل ئەمریکا ژی بهێتە کرن ئەو یەک رامانا هندێ نادەت کو دەستهەلاتا نها یا ئیرانێ سەرکەفتیە و دشێت هەموو تشتان وەکو بەری نها بەردەوامیێ بدەتێ، نە ئەو یەک راست نینە، چونکی گەلەک هەڤسەنگی ل دەڤەرێ هاتینە گوهۆڕین و ئەو یەک دێ کاریگەریا خوە یا هەری مەزن ژی ل ئیرانێ کەت).
بسپۆرێ پەیوەندیێن نێڤدەولەتی ئاماژە ب ڤێ یەکێ ژی کر، وەلاتێن عەرەبی نها کار بۆ بهێزکرنا پێگەهێ خوە دکەن و ئەو دزانن مەترسیا ئیرانێ ل سەر بەرژەوەندیێن وان زێدەتر لێ هاتیە، ل ئالیێ دی ئیران ژی یێ بزاڤان دکەت دا بشێت پێگەهێ خوە بهێزتر لێ بکەت و مانا دەستهەلاتا نها یا ئیرانێ ژی نیشا ددەت کو ئیران وەسا لاواز ژی نینە کو وەکو گەلەک کەسان هزر دکر دێ هەر زوو ژناڤ چیت.
ناڤهاتی د دووماهیا ئاخڤتنا خوە دا ئەو یەک ژی دیار کر، بێگومان دێ گوهۆڕینێن گەلەک مەزن ل رۆژهەلاتا ناڤین روو دەن، وەلاتێن رۆژهەلاتا ناڤین ژی هەست ب پێلا گوهۆڕینان کرینە و ئیران ژی دشێت ب چارەسەرکرنا پرسێن ناڤخوەیی ب تایبەتی ژی پرسا کوردان و نەتەوەیێن دی دەست ب قووناغەکا نوو بکەت و گەلەک مەترسیا ژ خوە دوور بکەت.
