ل زاخۆ كار ل سەر هەژمارەكا پڕۆژەیێن خزمەتگوزاری دهێتە كرن
زاخۆ، دلۆڤان هالۆ:
ل سنوورێ ئیدارەیا سەربخوە یا زاخۆ كار ل سەر هەژمارەكا پڕۆژەیێن خزمەتگوزاری دهێتە كرن.
شڤان عەبدی، بەرپڕسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر، هەژمارەكا پڕۆژەیێن خزمەتگوزاری یێن ل سنوورێ ئیدارا سەربخوە یا زاخۆ ب هەردو دەڤەرداریێن (زاخۆ، باتیفا)ڤە دهێنە بجهئینان و پڕانیا وان ژی بەر ب قووناغێن دوماهیێ نە، پێشكێشكرنا خزمەتگوزاریان ب هەموو سێكتەرێن خوەڤە ل سەر راسپاردا مەسروور بارزانی، سەرۆكێ حوكمەتا هەرێما كوردستانێ دێ بەردەوام بن.
شڤانی گۆت: «نوكە كار ل سەر هەژمارەكا پڕۆژەیان دهێتە كرن، ژ وان ژی: چێكرنا جادا جۆتساید ل دەڤەرداریا باتیفا، چێكرنا رێكێن ناڤخوەیی ل ناوچەداریا بێگوڤا، چێكرنا جادا جۆتساید ل ناوچەداریا دەركارێ و چێكرنا ڕێكێن ناڤخوەیی ل تاخێ سەرهلدان، دیسا دروستكرنا جادا جۆتساید ل (ئیبراهیم خەلیل – باچیكا ) و چێكرنا ڕێكێن ناڤخوەیی ل تاخێ بارزان، چێكرنا جادا كۆلیژا لەشكەری یا زاخۆ، چێكرنا جادا دادگەها زاخۆ، بەر فرەهكرنا جادا پێشمەرگە، چێكرنا ڕێكێن ناڤخۆیی ل تاخێ تلكەبەرێ».
