ل سنۆرێ دەڤەرداریا ئامێدیێ 42 پارچەیێن مین و تەقەمەنیان هاتنە دیتن
ئامێدیێ، مەحمود نهێلی:
د بەردەوامییا كارێ رێڤەبەرییا گشتییا كاروبارێن مینان دا ل دەڤەرێ، هەژمارەكا زۆرا مین و تەقەمەنیان ل دەڤەرا ئامێدیێ هاتنە دیتن و بۆ جهێ مەبەست هاتنە ڤەگوهاستن.
رێگر بێسفكی، بەرپرسێ راگەهاندنا رێڤەبەریا گشتی یا كاروبارێن مینان ل پارێزگەها دهۆكێ دیار كر، ل پارچە ئەردەكێ مینڕێژكری ل گوندێ بالندا یێ سەر ب ناوچەداریا شێلادزێ ڤە، كو نوكە تیمێن رێڤەبەریا وان ل وی جهی كار دكەن، مینەكا ژ جۆرێ V69 ژناڤبر، و گۆت: «گەلەكا پێدڤیە ئەڤ ئەردە بهێتە پاقژكرن، چونكی ژ لایێ گەشتیاری و رێك و بانان ڤە دێ چەندین پڕۆژە لێ هێنە ئەنجامدان، دیسا هەر ل سنۆرێ وێ ناوچەداریێ 38 فیۆز UXO بۆ جهێ مەبەست هاتنە ڤەگوهاستن».
گۆت ژی: «ل گوندێ سیداڤا یێ سەر ب ناوچەداریا سەرسنكێ ڤە مینەكا ژ جۆرێ VS50 ل گەل دو گوللەیێن 12.5 هاتنە دیتن و ب مەرەما ژناڤبرنێ هاتنە ڤەگوهاستن، هەروەسا ل ناوچەدارییا چەمانكیێ ژی ل زەڤیا مینڕێژا پیرمیسی ل گوندێ سیارێ، سێ مینێن ژ جۆرێ V69 هاتنە ژناڤبرن، د نوكە دا تیمێن مە د ناڤ ڤێ زەڤیێ دا كار دكەن و رێژەیا پاقژكرنێ گەهشتیە 96٪ هەتا نوكە 50 مین ل ڤێ زەڤیێ هاتینە دیتن و ژناڤبرن».
