ل سه‌رانسه‌ری هه‌رێمێ 41 سكرێن بچووك دێ هێنه چێكرن
هه‌ولێر، قائید میرۆ:
ل هه‌رێما كوردستانێ ده‌ست ب چێكرنا هه‌ژماره‌كا سكرێن بچووك هاتیه كرن و رێڤه‌به‌رێ گشتیێ ژێده‌رێن ئاڤێ ژی ل هه‌رێما كوردستانێ دبێژیت: 41 سكرێن بچووك ل سه‌رانسه‌ری هه‌رێما كوردستانێ دێ هێنه دروستكرن.
دكتۆر كاروان هه‌ورامی، رێڤه‌به‌رێ گشتیێ ژێده‌رێن ئاڤێ ل هه‌رێما كوردستانێ بۆ رۆژناما ئه‌ڤرۆ دیار كر، هنده‌ك ژ وان سكرێن بچووك چووینه د بیاڤێ بجهئینانێ دا و ژ لایێ كۆمپانیێن كار بۆ كه‌فتی كار ل سه‌ر دهێته كرن و گۆت: “رازیبوون ل سه‌ر دروستكرنا 41 سكرێن بچووك ل هه‌رێما كوردستانێ هاتیه كرن و ئه‌م به‌رده‌وام یێ كار ل سه‌ر دكه‌ین”.
دكتۆر كاروان هه‌ورامی گۆتژی: “مه‌ره‌م ژ چێكرنا سكرێن بچووك ئه‌ڤه‌یه مفا ژ ئاڤا بارانێ بهێته وه‌رگرتن، ئه‌و ئاڤا ل سه‌ر ئه‌ردی ب هه‌روه نه‌چیت و كێمتر ئاڤا بن ئه‌ردی ب كاربینین، چێكرنا ئه‌ڤان سكرێن بچووك ژبلی دێ مفا بۆ كۆمكرنا ئاڤێ هه‌بیت، دیسا دێ كاریگه‌ری ل سه‌ر ئاڤا بن ئه‌ردی ژی هه‌بیت، كو وه‌لاتی دشێن ئاڤا ئه‌ڤان سكران بۆ ڤه‌خوارنێ و كه‌رتێ چاندنێ مفای ژێ وه‌ربگرن، ژ لایێ حوكمه‌تا هه‌رێما كوردستانێ 26 ملیار دینار بۆ هاتینه مه‌زاختن”.
