ل سەر ئاستێ ئیراق و كوردستانێ سیستەمێ دیجیتالی یێ بانكی ل زاخـۆ دێ هێتە بجهئینان
زاخۆ، دلۆڤان هالۆ:
كۆڤان ئاڤدەل، ڕێڤەبەرێ چاڤدێریا بازڕگانی ل ئیدارەیا سەربخوە یا زاخۆ بۆ ڕۆژناما ئەڤرۆ دیاركر كو ژ بۆ پتر بەڕژەوەندیا گشتی و ب ساناهیكرنا كارێ بازڕگانیكرنێ، بۆ ئێكەم جار ل سەر ئاستێ ئیراق و كوردستانێ سیستەمێ دیجیتالی یێ بانكی ل زاخۆ دێ هێتە بجهئینان.
ناڤهاتی گۆت: «ئەڤ سیستەمە دێ جهێ پارەیێ كاش گریت، كو ب ڕێكا ئامیرێ POS دێ ل هەموو جهێن بازڕگانی یێن وەكو: مۆل و ماركێت و دوكانان هێتە دانان، وەلاتی دشێن ب ڕێكا كارتا بانكی هەر پێدڤیەكا هەبیت بكڕن و ب ڕێكا وی ئامیرەی پارەیێ خوە بدەن».
گۆت ژی: «د نوكە دا ئەڤ سیستەمە ل پتر ژ 300 مۆل و ماركێت و دوكانێن زاخۆ هاتیە دانان و كارتێن هەموو بانكان د خوینیت، د دەمێ سێ هەیڤێن بهێن دا ئەڤ سیستەمێ دیجیتالی یێ بانكی ب ڕێژەیا 100% ل سنۆرێ ئیدارەیا سەربخوە یا زاخۆ دێ هێتە بجهئینان».
كۆڤان زێدەتر گۆت: «بجهئینانا ڤی سیستەمی دێ بیتە بارسڤكی بۆ وەلاتیان، چونكی ڕێژەكا زۆر یا خەلكێ مە فەرمانبەرن و كارتێن بانكی هەنە، ئێدی پێدڤی ناكەت ئەو فەرمانبەرە بچنە بەر ئامیرێن ئەی تی ئێم و پاران ڕاكێشن، چونكی ئەو پارەیێ دهێتە ڕاكێشان هەر بۆ كەلوپەلانە، ئانكو ل شوونا وەرگرتنا پارەیێ كاش دێ كارتا خوە یا بانكی بۆ هەر تشتەكێ ل بازاڕی بكارئینن».
