ل سەر راسپاردەیێن جەنابێ سەرۆكی، ئێكەتیا زانایێن ئاینی هاتە دامەزراندن
دیدار، سالار محەمەد دۆسكی:
ل شۆڕەشا گولانێ هەم مامۆستایێ ئاینی و هەم پێشمەرگە بوویە و ئێك ژ دامەزرێنەرێن دەستەیا ئێكەتیا زانایێن ئاینی ئیسلامی ل كوردستانێ بوویە، پشتی سەرهلدانا پیرۆز بۆ ماوێ چەند سالان سەرۆكێ لقێ دهۆك یا ئێكەتیا زانایێن ئاینی بوویە، نوكە ئەندامێ لژنا فەتوایێ یە ل بارەگایێ ئێكەتیا زانایێن ئاینی لقێ دهۆك.
مامۆستایێ ئاینی و پێشمەرگێ شۆرەشا گولانێ، مەلا عسمەت گوهەرزی، ل سالا 1953 ل گوندێ گوهەرزێ ژ دایك بوویە، لدەسپێكا فێربوونا پیتێن قورئانێ ل مزگەڤتا گوندی فێربوویە، دووڤدا قەستا چەند گوند و باژێران دكەت وسالا خواندنێ 1966 – 1967 قەستا قەزا زاخۆ دكەت و دهێتە وەرگرتن دناڤا قوتابخانا ئاینی دا و دووڤدا بۆ پەیمانگەها ئیسلامی و دووڤدا كولیژا شەرعیێ ل بەغدا بدووماهی ئینایە و دهێتە دامەزراندن وەك مامۆستایێ زمانێ عەرەبی ل ئامادەیا شێلادزێ بۆ ماوێ شەش سالان و ل سالا 1987ێ دچیتە دناڤا شۆڕەشێ دا.
پێشمەرگە و مامۆستایێ ئاینی ملا عسمەت گوهەرزی، زێدەتر بۆ رۆژناما ئەڤرۆ گۆت: پشتی مە چەندین مامۆستایێن ئاینی پەیوەندی ب شۆڕەشێ كری بوومە ئیمامێ مزگەڤتا گوندێ(سەرنێ) و دووڤدا ب نڤیسار لقێ ئێك یا پارتی دیموكراتی كوردستان جەنابێ سەرۆك بارزانی ئاگەهداركر ل سەر هاتنا مە بۆ ناڤ شۆڕەشێ و جەنابێ وی فەرمان دا كو كار بۆ دامەزراندنا ئێكەتیا مامۆستایێن ئاینی بكەین، و مە دەستەیا مامۆستایێن ئاینی یا دهۆك نەینەوا دامەزراندن و دووڤدا مە كار ل سەر وێ چەندێ كر كو هەر بارەگایەكێ حزبی ل هەر جهەكێ هەبیت بارەگایەكێ ئێكەتیا زانا وێ دەڤەرێ بهێتە ڤەكرن وی دەمی من سێ دەوام دكر و سپێدەهی یا زارۆك دهاتن من فێركرن.
ملا عسمەت گوهەرزی، زێدەتر گوت: پشتی هەوا ئەنفالێن رەش هاتی ل گەل خێزان و مرۆڤێن خوە وەك هەمی خەلكێ كوردستانێ ل دەڤەرێن رزگار كری، مە قەستا باكورێ كوردستانێ كر، ل دەسپێكێ نەهێلا بچینە باكورێ كوردستانێ و جەندرمێن توركی رێگربوو لێ بروسكەك بوومە ژ مەكتەبا سیاسی هات و فەرمان دا دەربازی ئاخا توركی بین و ژنێن كورد وەك شێرا سنور بڕین و دەربازبووین و چەند رۆژا ل (چەلێ) ماین و گەلەك نەخوشی مە دیتن و چەند رۆژنامەڤان هاتن و هایداری بابەتی بوون، و دووڤدا (20) رۆژان ماینە ل (گەڤەرێ) دووڤدا بەرە ب ئیرانێ چووین ل گەل خێزانا خوە و چوومە وی وەلاتی، چونكە زێدەتر ئازادی هەبوو و هاتن وچوون و مرۆڤ دشیا بخوە كارەكی بكەت، وی دەمی ئێكەتیا زانا بارەگایێ وان ل وێرێ بوو و من خوە دانیاسین بوومە ئێك ژ رێڤەبەرێن ڤێ ئێكەتیێ و ئێكەتیا زانایێن ئاینی رۆلەكێ هەرە كاریگەر ل دەڤەرێ هەبوو، و جوداهی یا ئێكەتیا زانایێن ئاینی ل گەل ئێكەتیێن (قوتابیان، ژنان و مامۆستا) …هتد ئەو بوویە، ئەڤ ئێكەتیێن مە ئاماژە پێكرین بەرەڤانیێ ژ پیشەیا خوە دكەن، بەلكو ئێكەتیا زانایێن ئاینی بەرەڤانیێ ژ مللەتی دكەت، و گەلەك ئاریشێن خەلكی چارەسەردكرن و تایبەت ئاریشێن جڤاكی و هەتا نوكە و رەنگە وەك جهێ دادگەهێ دهێتە دیتن، بۆ دیاركرنا دادپەروەردیێ و رۆلێ ئێكەتیا زانا نە بەرەڤانیكرنە ژ مامۆستایێن ئاینی بەلكو ئەڤە چە قەك بوویە لێ زێدەتر خزمەتكرنا جڤاكی و تایبەت ئاریشێن خێزانی رۆلەكێ كاریگەر هەبوویە.
ملا عسمەت گوتژی: هەر جهەكێ مرۆڤ لێ هەبن دێ كێشە هەبن وی دەمی ل ئیرانێ ژی كێشێن خێزانی و كچ و كوران هەبووینە و ئێكەتیا زانایێن ئاینی رۆلەكێ هەرە كاریگەر هەبوویە و یا فەری بوو ل ئیرانێ و هەتا ئەوروپا ژی و گرێبەستێن ژن ئیانێ و ژێكڤەبوونێ ل ئێكەتیا زانا دهاتنەكرن و كاغەزا ئێكەتیا زانایێن ئاینی دانپیدان پێ هاتبووكرن، ل ئەو جهێن پێشتر مە ئاماژە پێكری و گەلەك ئاریشا چارەسەردكەین وەك هاریكارین بۆ دادگەهێ و ئەگەر ئاریشە یا مەزن بیت دهێتە رەوانەكرن بۆ دادگەهێ.
ملا عسمەت زێدەتر گۆت: سێ سالێن گەلەك بزحمەت مە ل ئیرانێ دەربازكرن وی دەمی زارۆكێن من دبچووك بوون و ئەژی نەیێ چ كارا بووم و بەری سەرهلدانێ جەنابێ سەرۆكی هاتە بارەگایێ ئێكەتیا زانایێن ئاینی و گۆت: چەند رۆژێن بهێت دێ قەستا كوردستانێ كەم و هەكە سەرهلدان سەركەفت یا بنەجه بوو و سەركەفت دێ بوو هەوە بروسكەكێ رەوانەكەم و هوون ژی وەرن و پشتی چەند رۆژان ژلایێ جەنابێ وی ڤە هاتینە هایداركرین كو بهێنە كوردستانێ و ئەم (21) زانایێن ئاینی مە چەك ل مالا سەرۆكی وەرگرت و هەلگرت و مە قەستا كوردستانا ئازادكر وی دەمی (ملا محمود دێرشەوی) سەرۆكێ مەبوو و مەلا (عەبدلغفور و مەلا ئیسلام) و چەندین مامۆستایێن دی ژی كو گەلەكا وەغەركرینە خودێ ژ هەمیان رازیبت وی دەمی 70% مامۆستایێن ئاینی لاینگرێن پارتی دیموكراتی كوردستان بوون و ئەڤێن دی ئێكەتی بووینە، پشتی گەهشتینە حاجی عومران ئەم هەمی زانایێن ئاینی چووینە سوجدا شوكرێ بۆ خودێ كو پشتی چەند سالێن دەربەدەریێ جارەكادی مە بایێ ئازادیێ هەلكێشا و دووڤ دا چووینە هەولێرێ بارەگایێ بەرەی كوردستانی و دووڤ دا بەرەف مەسیفی هاتین و ب رێكێ ڤە ترۆمبێلا مە ژ كار كەفت و فرۆكە ل هنداڤ مە رەمی دكر وبیرا من دهێت كەسەك بریندار بوو و هەیڤا رەمەزانێ بوو و مەغرەبەكا درەنك گەهشتینە مەسیفی و دووڤ دا ب ترۆمبێلەكێ گەهشتینە (كورێ) رۆژا دووڤدا گەهشتینە شەقلاوە جەنابێ سەرۆكی وێرێ بوو و (مەلا محمود دێرشەوی) چوو نیك سەرۆكی و ل سەر بابەتی و دووڤدا هاتینە (دیانا) وی دەمی دانوستاندن دەسپێكرن دناڤبەرا كوردان و حوكمەتا ئیراقێ دا، ل دانوستاندێن كوردان ل گەل بەغدا دەسپێكێ (فازل میرانی) دووڤدا (مام جەلال تەلەبانی) دووڤدا جەنابێ سەرۆك(مەسعود بارزانی) چوو بەغدا و مە بارەگایێ خوە یێ ئێكەتیا زانایێن ئاینی برە مزگەفتا گوندێ(مەزنێ) ل نێزیك مێرگەسورێ وی دەمی مە خوە كرە دو شێفت شێفتەك ل مال و شێفتەك دەوامێ و هەر 30 رۆژا جارەكێ چووینە مال و جارەكێ دو هەیڤان من مالا خوە نەدیت.
هێشتا گۆت: پشتی بارودوخێ كوردستانێ باشتر چێبووی، كونگرێ ئێكەتیا زانایێن ئاینی هەولێرێ هاتە بەستن و وی دەمی ئەز و مەلا ئیسلام هاتینە دهۆك وەك ئەندامێن دەستەیا كارگێری یا ئێكەتیا زانا مەدانا مزگەفتا (شێلێ) و مەلا ئیسلام رێكانی سەرۆك بوو و ئەز جێگربووم و جارەكێ جەنابێ سەرۆكی سەردانا مە كر، دووڤدا ئاڤاهیێ ئێكەتیا زانا مە بۆ بنگەهەكی ل نێزیك كارگێری یا پارێزگەهێ ڤەگوهاست و پشتی چەند سالان و دووڤدا ئاڤاهیێ نوكە بۆ ئێكەتیا زانایێن ئاینی هاتە ئاڤاكرن.
ملا عسمەت گوهەرزی زێدەتر گۆت: نەخوشترین دیمەنێ من دیتی دەمێ پێش نڤێژ ل مزگەڤتا( سەرنێ) و هەوا ئەنفالا دەسپێكر و كومەكا پەرتووكێن منێ پر بها كو بهایێ نێزیكی(10) هزارێن سویسری بوون هەمی هاتنە سوتن، جارەكێ ل گەل چەند هەڤالان زڤرینە گوندی دا هندەك ئەرزاقی بخوە بەین و دەمێ من مالا خوە ب وی رەنگی دیتی دلێ من سوت و گریا من هات و دیسا ل (گەڤەرێ) ژی گڤاشتنێن چەكدارێن تور ل سەر مە گەلەك كارتێكرن ل سەر مەكر و یا نەخوش بوو، دیسا دیمەنەكێ نەخوش من دیتی ئێك دناڤا پێشمەرگەی دا هەبوو دەست ل گەل توركا هەبوو و هەر كەسەكێ ئەوان دەستێ خوە درێژكرربایێ ئەو كەس دا گەلەك هێتە ئێشاندن و گەلەك بەرپرسێن مە ئەوا دەستێ خوە درێژكرێ و گەلەك هاتنە ئێشاندن و دووماهیێ ئەو كەس ئاشكرابوون.
ل دووماهی ملا عسمەت گوهەرزی زێدەتر ژی گۆت: داخازێ ژ پارتێن سیاسی دكەم بلا تەنازولێ ژ هندەك تشتێن خوەیێن كەسوكی و حزبی بكەن بۆ بەرژوەندا گشتی ئێكبگرن چونكە تفاق بۆ مللەتێ مە ل ڤێ قوناغێ گەلەك و ماندیبوون و خوینا شەهیدێن كوردستانێ بلا بەلاش نەچیت، ئەڤا نوكە گەهشتینێ مە دخەونا ژی دا باوەرنەدكر.
