ل سەر رووبەرێ 15 دۆنەمێن ئەردی دێ پاركەك ل سەرسنكێ هێتە دروستكرن
ئەمیر ئەترووشی
سەرۆكێ باژێرڤانیا سەرسنكێ دیار كر، مەزنترین پارك ل سەر رووبەرێ پتر ژ 15 دونەمێن ئەردێ ل ناحیا سەرسنكێ دهێتە دروستكرن، ئەڤ پاركە دێ ل پشت ئاڤاهیێ ناحیا سەرسنكێ هێتە چێكرن و گۆت: د بەردەوامییا پرۆژێن حكومەتا هەرێما كوردستانێدا دەست ب چێكرنا رێكێن نافخو ل كومەلگەها (قەدشێ – سەرسنكێ – بامەرنێ) ب كوژمێ ملیارەك و 73 ملیون دیناران هاتیە كرن.
سەرجون خوشابە، سەرۆكێ باژێرڤانیا ناحیا سەرسنكێ بۆ رۆژناما ئەڤرۆ دیار كر، «ئێك ژ مەزنترین پارك بۆ بێهنڤەدانێ دێ ل ناحیا سەرسنكێ هێتە چێكرن، ئەڤ پاركە دێ ل پشتا ئاڤاهیێ ناحیێ بیت و رووبەرێ ئەردی هاتییە دەستنیشانكرن دگەل دروستكرنا هژمارەكا باخچەیان و ب مەرەما پتر زێدەكرنا رێژا كەسكاتیی ل ناحیا سەرسنكێ پلانەكا گەلەك باش بۆ پتر خزمەتكرنا وەلاتیان ل سەرسنكێ هاتییە دانان».
ئاشكەرا كر: «پلان بۆ ئیدارا پارێزگەها دهۆكێ هاتییە رەوانەكرن، هەر دەمێ پارەیێ پێدڤی بهێتە تەرخانكرن دێ دەست بجهئینانا پارك و باخچەیان ل سەرسنكێ هێتە كرن».
ئاشكرا ژی كر، نها پرۆژەیەك ل سەرسنكێ دهێتە ئەنجام دان و بەرەف قوناغێن ئامادەكرن بۆ قێركرن و كۆنكریتكرنێ چوویە، ئەوێ دهێتە بجهـئینان ژلایێ كومپانییا (ئیسفكا) ڤە ل سەر پارێ بودجا تایبەت یا پارێزگەها دهۆكێ و گۆت: ئەڤ پرۆژە چێكرنا رێكێن نافخۆیە ل كۆمەلگەها (قەدشێ – سەرسنكێ – بامەرنێ) ب كوژمێ ملیارەك و 73 ملیون دیناران.
ناحیا سەرسنكێ ب دووراتیا 50 كم ژ دهۆك دوورە و دەڤەرەكا گەشتوگوزاری یە و چەندین ئۆتێل و مۆتێل و جهێن گەشتوگوزاری ل سەرسنكێ هەنە.
