ل هه‌رێما كوردستانێ هه‌شت ئایینێن فه‌رمی هه‌نه
ئه‌ڤرۆ، نه‌وزاد هلۆری:
ژبلی قانوون و ده‌ستووری هه‌ڤده‌م ل پشكه‌كا هه‌ره زۆر یا وه‌لاتێن جیهانێ ب تایبه‌تی رۆژهه‌لاتا ناڤه‌راست ئاریشێن جڤاكی ب رێیا ئایینان دهێنه چاره‌سه‌ركرن، ل هه‌رێما كوردستانێ هه‌شت ئایینێن فه‌رمی هه‌نه، رێڤه‌به‌رێ ئایینان ل هه‌رێما كوردستانێ دیاركر كو رولێ وان د چاره‌سه‌ركرنا پرسێن جڤاكی دا زۆر گرنگه.
ئه‌میر عوسمان، رێڤه‌به‌رێ پێكڤه‌ژیانا ئایینان ل هه‌رێما كوردستانێ دیاركر كو جڤاكێ كوردستانێ د كه‌ڤندا هه‌تا نوكه روله‌كێ ئه‌رێنی و كارتێكه‌ر د چاره‌سه‌ركرنا پرسێن جڤاكی دا هه‌بویه و بۆ ئه‌ڤرۆ گۆت: (ل گوره‌ی قانوونا هژمار پێنج یا سالا 2015ێ كو په‌رله‌مانێ كوردستانێ ب تێكرا ئه‌ندامێن په‌رله‌مانی ده‌نگ بو دایه و بویه قانوون و نوكه حوكمه‌تا هه‌رێما كوردستانێ كار ل سه‌ر دكه‌ت هه‌شت ئایینێن فه‌رمی هه‌نه كو ئه‌و ژی ئایینێ ئیسلامێ، ئایینێ كریسیانان، ئێزدی، زه‌رده‌شتی، كاكه‌یی، سابیئی، به‌هائی و جوهیان بخوڤه دگرن).
رێڤه‌به‌رێ پێكڤه‌ژیانا ئایینان ئه‌و چه‌نده ژی دیار كر هه‌موو ئایینێن كوردستانێ بناڤێ كومه‌لا ئایینان یان نه‌ته‌وه‌یان بخوڤه دگرن، جهێ داخێ یه چو ئامار ل به‌ر ده‌ست نینن كا هه‌ر ئێك ژ وان ئایینان چه‌ند لایه‌نگیرێن خوه هه‌نه و گۆت: (بزاڤ دهێنه كرن وه‌زاره‌تێن پلاندانان یێن هه‌ردوو حوكمه‌تێن هه‌رێما كوردستانێ و عیراقێ ژی كار ل سه‌ر ئامارێن وان بكه‌ن، گرنگه د چارچوڤێ وان ئاماران دا ده‌ڤه‌رێن ئاریشه‌دار ژی ل گه‌ل بن، ژبه‌ركو پرانیا پێكهاته‌یێن ئایینێن نه موسلمان دكه‌ڤنه وان ده‌ڤه‌ران، به‌لێ زورترین رێژا رونشتڤانێن هه‌رێما كوردستانێ موسلمانن و كێمترین ژی جوهی نه).
ئه‌میر دا زانین كو هه‌موویان نونه‌رێن خوه ل حوكمه‌تا هه‌رێما كوردستانێ هه‌نه و گۆت: (ئه‌رك و مافێن هه‌موو پێكهاته‌یێن ئایینی و نه‌ته‌وه‌یی ل هه‌رێما كوردستانێ ل گوره‌ی قانوونێ د پاراستنی نه و پێكڤه ژیانه‌كا هه‌ره گرنگ هه‌یه و بێ ئاریشه دژین، ل پارێزگه‌ها دهۆكێ هه‌موو ئایین تێدا هه‌نه، بێگومان كه‌سانێن شاره‌زا و خودان ئه‌زموون و رێز دناڤ ڤان ئایینان دا هه‌نه و رولێ وان د چاره‌سه‌ركرنا ئاریشێن جڤاكی دا روله‌كێ كاریگه‌ره و ل سه‌ر بنه‌مایه‌كێ بهێز ئاریشان چاره‌سه‌ر دكه‌ن ب تایبه‌تی وه‌كو لایه‌نێ سیێ دناڤا ئاریشان دا، داكو بهێته چاره‌سه‌ر كرن).
ل بارا وان نه‌ته‌وه‌یێن ل كوردستانێ دژین، بروا عومه‌ر به‌رپرسێ راگه‌هاندنا وه‌زیرێ پێكهاته‌یان یا حوكمه‌تا هه‌رێما كوردستانێ گۆت: (كورد و توركمان دوو پێكهاتێن سه‌ره‌كی یێن هه‌رێما كوردستانێ نه و ل ده‌ستوری هاتینه بجهكرن، ژبلی ڤان كلدان، سریان و ئاشووری ژی وه‌كو ئێك ژ پێكهاته‌یێن سه‌ره‌كی دهێنه هژمارتن، هه‌ر ه‌نده نوكه عه‌ره‌ب ژی ل هه‌رێما كوردستانێ هه‌نه و دژین، به‌لێ ژبه‌ركو د ده‌ستوری دا نه‌هاتینه تومار كرن ب پێكهاته‌یا كوردستانی ناهێنه هژمارتن، هه‌موو ئه‌و پێكهاته‌یێن نه‌ته‌وه‌یێن كوردستانێ نونه‌رێن خوه ل په‌رله‌مان و حوكمه‌تێ هه‌نه بۆ دووڤچون ل سه‌ر ئاریشه و ئه‌رك و مافێن وان هه‌تا خوه وه‌زاره‌ت داینه پێكهاتێن نه‌ته‌وه‌یی، د وارێ پێكڤه ژیانا نه‌ته‌وه‌یی دا چو ئاریشه دناڤبه‌را وان نینن و هه‌موو پێكڤه دژین، زۆرترین هژمارا وان ژی كوردن).
