ل پۆلۆنیا 13 هونهرمهندێن كورد پێشانگهههكا شێوهكاری یا ههڤپشك ڤهكر
زنار تۆڤی:
گهلهریا «لیكتان» ل ستۆكهۆلما پایتهختێ سویدێ و سهنتهرێ رهوشهنبیری یێ «وێچێچێ» ل پۆلۆنیا، پێشانگهههكا شێوهكاری یا ههڤپشك بۆ 13 هونهرمهندێن كورد و هونهرمهندهكێ سۆیدی، ل ژێر ناڤێ «هونهرێ بێ سنوور»، ل باژێرێ وێچێچێ ل وهلاتێ پۆلۆنیا ڤهكر و بۆ دهمێ دو ههیڤان دێ یا بهردهوام بیت و هونهرمهندێن پشكدار پێكهاتینه ژ، زال ئاری، زاهر حسێنی، دهشتی جهنگی، ئاشنا دهولهت، خالد ستار، موعین رامان، یوسف رێگا، هانێس ئیساكسۆن، دۆرپێچ كۆبانی، تاڤگه عوسمان، چنور فتوحی، ئاسیا بهكر، نهسرین شاكهلی.
دهشتی جهنگی، هونهرمهند و پشكدارێ وێ پێشانگههێ دیار كر: «ئهڤ پێشانگههه ژ لایێ ناڤهرۆك و فهلسهفا هونهریڤه، دهربرینێ ژ رووبهرهكێ فرهرهههند و كویر دكهت كو تێدا دیتن، ئهزموون و قوتابخانێن شێوهكاری یێن جودا یێن 13 هونهرمهندێن ههر چار پارچێن كوردستانێ، ل گهل هونهرمهندهكێ سوێدی تێكههلی ئێك دبن.
ناڤهاتی گۆت ژی: بهرههمێن هاتینه نیشاندان ل سهر چهندین تهكنیك و شێوازێن جودا یێن وهك ریالیزم، ئهبستراكت، نوویاتیێ و سوریالیزمێ دابهش بووینه، ئهڤ چهنده ژی بوویه ئهگهر كو پێشانگههـ ببیته مهیدانهكا دهولهمهند بۆ دیالۆگا فرهكولتووری و لێكگوهۆرینا ئهزموونا شێوهكاری د ناڤبهرا رۆژههلات و رۆژئاڤا دا، ههروهسا كهڤالان تیشك خستینه سهر ناسناما نهتهوهیی، دیرۆك و خهمێن ههڤپشك یێن مرۆڤێ كورد، ل گهل نیشاندانا جوانیێن بێ دووماهی یێن سروشتێ كوردستانێ و زیندیكرنا هێمایێن فۆلكلۆی و كهلهپووری ب زمانهكێ ههڤچهرخ كو بشێت سهرنجا بینهرێ ئورۆپی رابكێشیت و رهسهناتیا ڤی كولتووری پێ بدهته نیاسین.
دهشتی جهنگی دیاركر ژی: كۆمبوونا ئهڤان ههموو داهێنانێن جودا ل ژێر سیبهرا ڤێ پێشانگههێ، دیاركرنا وێ راستیێ یه كو هونهر زمانهكێ جیهانی یی بێ سنۆره و خودان هێزهكا ڤهشارتییه بۆ شكاندنا ههموو سنۆرێن جوگرافی، سیاسی و نهتهوهیی، ب رهنگهكی كو دشێت پرا پهیوهندییا مهعریفی و رۆحی دناڤبهرا گهلێ كورد و گهلێن ئورۆپادا، ب تایبهتی جڤاكێ پۆلۆنی، بهێز ئاڤابكهت و پهیاما ئاشتی، مرۆڤدۆستی و ئازادیخوازییا مرۆڤێ كورد ب رێیا رهنگ و هێلان بگههینیته جیهانێ.
