ل ژیێ نەهـ سالیێ من دەست ب گۆتنا سترانان کریە
زاخۆ، دلۆڤان هالۆ:
هونەرمەندا کورد یا دەنگ خوەش یا باکوورێ کوردستانێ د دیدارەکێ دا بۆ ڕۆژناما ئەڤرۆ دیارکر کو ئەز ل وەلاتێ ئەلمانیا ژ دایك بوویمە، و هەتا نوکە ژی ل وێرێ دژیم، لێ د بنیات دا ئەز خەلکا ناڤچەیا نسێبینێ یا باکوورێ کوردستانێ مە، و د نوکە دا ژی ئەز قوتابیا بەشێ پارێزەریێ و مافناسیێ مە ل زانیگەهێ، ژیێ من ٨ سالی بوو دەمێ کو من دەست ب فێرکرنا ئامیرێ تەمبۆرێ کری، و ل ژیێ 8 سالیێ من دەست ب گۆتنا سترانان کریە، و ئەز دزانم هەر دوو ئامیرێن مۆزیکێ تەمبۆر و گیتارێ بژەنم.
ناڤهاتیێ ئاماژە ب وێ چەندێ ژی کر کو مالباتا من هەموویان ب تایبەت بابێ من گەلەك هاریکاری و پشتەڤانیا من کرینە و بەردەوام پشتەڤانیا من دکەن، هەتا نوکە من پتری 30 سترانان هەنە کو ژ هەلبەست و ئاوازێن من بخوەنە، و هەموو سترانێن من خوەشن و تایبەتمەندیا خوە ل دەف من هەیە، ئەز ب ڤان سترانان ناڤدار بوویمە وەکو سترانێن لاوو دینۆ و ما ڕۆژەکێ نایێم بیرا تە و ماشۆپا کوردی، د نوکە دا من 9 سترانێن نوو بەرهەڤکرینە کو ژ هەلبەست و ئاوازێن من بخوەنە، و ئەز بەرهەڤیێن دروستکرنا ڤیدیۆ کلیپەکا نوو ژی دکەم.
ڕۆژبینا هونەرمەند گۆت:»مۆزیك و ستران ب خودان دەرکەتنا کەلتوور و هونەری یە، و ب خودان دەرکەتنا بنیات و زمانێ خوەیە، مرۆڤ کول و خەمێن خوە و یێن وەلاتێ خوە ب ڕێکا سترانێ دەردئێخیت، مخابن بیانیان گەلەك ژ زمان و مۆزیك و کەلتوورێ کوردان دزینە، لێ سازیێن کوردان و هونەرمەندێن کورد ل بەرامبەر ڤانا بێ دەنگن، پێدڤیە هونەرمەند ل مافێ خوە ب خودان دەربکەڤن».
گۆت ژی:»داگیرکەرێ ل وەلاتێ کوردان ژ بۆ کوردان بنبربکەن زمان و مۆزیکا کوردان ژی تالان کرن و قەدەغەکرن، لێ سەرەرای ڤێ زۆرداری و سەردەستیا وان کوردان زمان و مۆزیکا خوە هندەك ژێ پاراستن، د نوکە دا کورد ل هەموو دونیایێ بەلاڤ بووینە و هونەرێ خوە و مۆزیکا خوە ب هەموو دونیایێ دایە نیاسین کو گۆهداریا هونەرێ کوردی بکەن، ئەڤ چەندە پێنگاڤەکا گەلەك باشە».
زێدەتر ژی گۆت:»هیڤی و ئارمانجا من ئەوە کو کورد ل زمان و مۆزیکا خوە ب خودان دەرکەڤن و پێشبێخن، و زێدە گرنگیێ بدەنە سترانێن کوردی ب تایبەتی ژی ڤێ چەندێ بۆ کچێن کورد دخوازم، ئەز هیڤیدارم هەموو هونەرمەندێن کورد ل سەر کارێ خوە یێ هونەری بەردەوام بن لێ ب زمانێ خوە سترانان بێژن، و ل هەڤدوو ب خودان دەرکەڤن و پشتەڤانیا هەڤدوو بکەن، هەموو باژێڕێن کوردستانێ ل دەف من خوەشن، لەورا ئەگەر خودێ حەز بکەت ببیتە قسمەت ئەز دێ چەندین کۆنسێرتان ل کوردستانێ سازکەم».
