مالخۆیێ مالێ مالا لێ حه‌رام بووی!
كه‌س ژ مه نینه های ژ ناڤێ سه‌رسنكێ نه‌بووی، هه‌روه‌ختێ ناڤێ وێ ڤبه‌ر گۆهێن مرۆڤی دكه‌ڤیت، ئێكسه‌ر دیمه‌نێن وێ یێن سه‌یران و سه‌یرانچیا دهێنه به‌ر چاڤێن مرۆڤی. ئه‌ڤ چه‌كۆچێ مه ب بزمارا ژی ڤه وه‌ستیا، ئێدی چه‌كۆچ و بزمار و ئاخڤتن ژی د بێ مفانه. سه‌رسنكێ جهێ ئێكێ یێ سه‌یران و سه‌یرانچیا بوو، قیبه‌له‌یا سه‌یرانا ل سه‌روه‌ختێن كه‌ڤن بوو، نه‌خاسمه هه‌ر ژ سالێن سیها وه‌ره كریارا سه‌یران و سه‌یرانچیا ل ڤی گوندی دهێته كرن، هه‌ر ئه‌وی جهێ ساحر ب سحرا خۆ قه‌سرا مه‌لكی و ئوتێلا به‌ری ل سه‌ر زكێ خۆ دانان و كرنه چه‌ڤه‌نگێن سه‌یرانا ل سه‌رانسه‌ری ئیراقێ.
ئه‌ڤه بتنێ ژی به‌س نه‌بوو، سه‌رسنكێ ل سالێن چلا و وێڤه ب بوو جهێ بریاردانێ ل هه‌می ئیراقێ، پتر ژ هه‌شت بریارێن مه‌لیكی ل ڤی جهی ده‌ركه‌ڤتینه و كونگرێ سه‌رسنكێ ئه‌وێ دناڤبه‌را مسر و ئیراقێ یێ بناڤ و ده‌نگه، زێده‌باری پێكئینانا كابینا نوری سه‌عیدی ل سالا (1955). ئه‌ڤه ژی چێرۆكه‌كا دویر و درێژه هه‌وجه ناكه‌ت ل سه‌ر وێ دیرۆكا مه‌زن براوه‌ستین.
نوكه هێدی هێدی سه‌رسنكێ یا ژوێ سه‌متێ ده‌ردكه‌ڤیت، وه‌كی هه‌ر جهه‌كێ دی كو ئه‌وا دبێژنێ (وه‌به‌رهێنان) یا لێ دهێته كرن ئانكو پتر وه‌كی جڤاته‌كا خۆجهبوونێ یه ژ جهه‌كێ سه‌یران و سه‌یرانچیا. چ تشتێن گرێدای سه‌یرانان لێ نینن، نه پارك و نه‌ژی یاری و نه‌ژی داڤه‌رست و نه سویلاڤ و نه‌ژی خارنگه‌هێن به‌ركه‌تی. یا ژ هه‌می لایه‌كیڤه دنالیت. یا ژڤێ نه‌خوشتر ژی ئه‌وه نوكه وه‌ختێ د راپۆرتێن تله‌فزونی دا به‌حسێ سه‌یران و سه‌یرانچیا دكه‌ن، سه‌رسنكێ یا ژ وێ سحبه‌تێ ڤه‌ده‌ره، هه‌روه‌كی دبێژن: مالخۆیێ مالێ ب خۆ یێ زڕبه‌هر بووی!، چاوا سحبه‌تا سه‌یران وسه‌یرانچیا دهێته كرن و سه‌رسنك د ناڤ وێ سحبه‌تێ دا نه‌بیت، راستی مرۆڤ دمینیته حێبه‌تی.
هیڤیا مه ئه‌وه به‌ری مالخۆیێ مالێ بمریت، مفا ژ ناڤوده‌نگی و سه‌ربۆرا وی بهێته وه‌رگرتن، ژ سه‌رسنكێ سه‌یرانان یا ده‌ستپێكری و سه‌رسنكێ گه‌له‌ك سه‌یرانچی یێن چێكرین و دێ ل سه‌رسنكێ سه‌یران به‌ر ب پیشڤه چن.
