مالكێ سێداره‌دانا علوانى ده‌رخست و حه‌یده عه‌بادى داخوازا ده‌رخستنا مالكى دكه‌ت
ئه‌ڤرۆ نیۆز:
نڤیسینگه‌ها سه‌رۆك وه‌زیرێن عیراقێ حه‌یده‌ر عه‌بادى ئاشكراكر، حه‌یده‌ر عه‌بادى ل گه‌ل بالیۆزى ئه‌مریكى ستیوارت جونز گازنده ژ كارێن نورى مالكى كرینه، هه‌ڤده‌م دیاركر نورى مالكى زاڤان بۆ شكه‌ستنا حوكمه‌تا عه‌بادى و درێژه پێدانا شه‌رێ ل گه‌ل چه‌كدارێن داعشێ ل عیراقێ دكه‌ت.
نڤیسینگه‌ها عه‌بادى هه‌روه‌سا رونكر، سه‌رۆك وه‌زیرێن عیراقێ بۆ ژ بالیۆزێ ئه‌مریكى ستیوارت جونز دیاركر، كو مالكى ده‌ستهه‌لاتا خوه ل گه‌ل دادگه‌ها بلندا عیراقێ بكاردئینایه بۆ ده‌رخستنا بڕیارا سێداره‌دانا په‌رله‌مانتارێ به‌رێ یێ عیراقێ ئه‌حمه‌د علوانى، ئه‌و چه‌نده ژى عه‌بادى نه‌ڤشارتیه بۆ بالیۆزێ ئه‌مریكى كو ده‌ستهه‌لاتا مالكى ل سه‌ر دادگه‌ها بلندا عیراقێ گه‌فه‌كا مه‌زنه، و گۆت: به‌رى ده‌رخستنا وێ بڕیارێ ب رۆژه‌كێ وى په‌یوه‌ندى ب دادگه‌هێ كریه كو وێ بڕیارێ نوكه راگرن یان بهێته پاشخستن بۆ ده‌مه‌كێ دى.
حه‌یده‌ر عه‌بادى هه‌روه‌سا گۆت: هۆزا په‌رله‌مانتارێ به‌رێ یێ عیراقێ ئه‌ڤرۆ د به‌رۆكێن شه‌رێ دژى چه‌كدارێن داعشێ دایه ب جهئینانا وێ بڕیارێ دێ ره‌نگڤه‌دانێن خراب بۆ هه‌بن.
ل گۆر هنده‌ك ژێده‌رێن نێزیك ژ عه‌بادى هاتیه زانین كو، حه‌یده‌ر عه‌بادى داخوازا پشته‌ڤانیا ئه‌مریكى كریه بۆ ڤه‌كرنا باده‌كا گه‌نده‌لیێ ل سه‌ر مالكى بۆ دادگه‌هكرنێ یان دوور خستنا وى ژ عیراقێ.
