مامۆستایه‌كێ زانكۆیێ”:50% پرۆگرامێن خواندنێ ل زانكۆیێن كوردستانێ مه‌لزه مه‌نه
سلێمانی، عه‌زیز هه‌ورامی”
مامۆستایه‌كێ پشكا مێژوویێ ل زانكۆیا سلێمانیێ ئاشكراكر كو زانكۆیێن كوردستانێ ئاگه‌ه ژ پرۆگرام و بابه‌تێ، ئێك دو نینه و هه‌ر ئێك وه‌ك خوه سه‌رده‌ریێ ل گه‌ل قوتابیێن خوه دكه‌ت، ئاشكراكر كو 50% پرۆگرامێن خواندنێ ل زانكۆیێن كوردستانێ مه‌لزه مه‌نه.
پ.د. كه‌یوان ئازاد، مامۆستایێ پشكا مێژوویێ ل زانكۆیا سلێمانیێ بۆ به‌رپه‌رێ په‌روه‌رده و زانكۆ ل رۆژناما ئه‌ڤرۆ به‌حسێ رێكخستنا پرۆگرامێن خواندنێ ل زانكۆیێن كوردستانێ كر و گۆت: هه‌تا نوكه وه‌زاره‌تا خواندنا بلند ل حوكمه‌تا هه‌رێما كوردستانێ خودان پرۆگرامه‌كێ ئێكگرتی نینه و زانكۆیان هه‌ش بابه‌ت و پرۆگرامێن ئێك دو نینه و گرنگه ئێك پرۆگرامێ خواندنێ ل هه‌موو زانكۆیێن كوردستانێ هه‌بیت و ئه‌ڤا نوكه هه‌ی كاره‌ساته.
پ.د.كه‌یوان ئازاد گۆتژی: هه‌رێما كوردستانێ خودانا هژماره‌كا زانكۆیێن ئه‌هلی و حوكمی یه هه‌تا 13 زانكۆیێن حوكمی تێدا هه‌نه، بمخابنی ڤه ل دوویف حه‌ز و ڤیانا مه و كومه‌لگه‌هێ كوردی نه‌بووینه و لاوازی یا پێڤه دیاره و دشێن بێژین هه‌تا ئاسته‌كی پاشكێشی كریه و ئه‌ڤه ژی خوساره‌تیه‌كا مه‌زنه.
هه‌مان مامۆستا گۆت: ژ زاخۆ هه‌تا دگه‌هیته گه‌رمیان 13 زانكۆیێن حوكمی مه هه‌نه و خوه ئێك هاش ئێك و دو نینه و چ په‌یوه‌ندی دناڤبه‌را وان دا نه‌بووینه، زانكۆیێن هه‌ولێرێ هاژ زانكۆیێن سلێمانیێ و گه‌رمیان نینن و نوزان ئه‌و چ دكه‌ن و هه‌مان ده‌م زانكۆیێ، راپه‌رین و كویه هاژ زانكۆیێن دهۆك و زاخۆ و سوران نینه و هه‌تا مامۆستایێن زانكۆیان ژی هاش ئێك دو نینه، ئه‌ز مامۆستایێ مێژوویێ م ل زانكۆیا سلێمانیێ من ئاگه‌ه ژ هه‌ر تشته‌ته‌كی نینه ل زانكۆیێن كوردستانێ و پتریا مامۆستا ب هه‌مان شێوه نه كولیژا و نه پشكێن كولیژان ئاگه‌ه ژ ئێك دو نینه و ئه‌ڤه ژی دیارده‌كا نه‌باشه، پرسیاره‌كێ ژ هه‌می خه‌لكێ كوردستانێ دكه‌م ئه‌رێ دبیت مامۆستایێن پشكان ئێكدو نه‌نیاسن، ژلایه‌كێ دی ڤه هه‌ر زانكۆیه‌كا كوردستانێ پرۆگرام و پلانا خوه یا تایبه‌ت هه‌یه
بێكو بزانن هه‌می لژێر سه‌یوانا وه‌زاره‌ته‌كا حوكمی نه ل هه‌رێما كوردستانێ، بمخانبی ڤه دبێژم 50% پرۆگرامێن خواندنێ ل زانكۆیێن كوردستانێ مه‌لزه مه‌نه ئانكو هه‌ر مامۆستایه‌ك سالێ چه‌ند وانه‌یه‌ك ب قوتابیێن خوینت و دوویف دا وه‌ك مه‌لزمه راده‌ستی قوتابیان دكه‌ت هه‌تا ژ به‌ر بكه‌ن، ل هه‌موو زانكۆیێن كوردستانێ بگه‌ری 100 په‌رۆتوكێن مه‌نهه‌جی تێدا نابینی كو پرۆففیسورێن كوردستانێ دانابن ل سه‌ری به‌ره‌وان بن و بخوینن، ئه‌ڤه ده‌مه‌كی دا ل زانكۆییێن كوردستانێ ب سه‌ردان پرۆفیسور هه‌نه و گرنگه دڤیابا ئه‌ف كاره هاتباكرن، ب سوپاسی ڤه هنده‌ك كار هاتیه كرن به‌لێ نه لدوویف یا پێدڤی بوویه.
وه‌ك مامۆستایه‌كێ مێژوویێ من په‌رتووكه‌كا ئه‌كادیمی ل سه‌ر مێژوویا ئمبراتوریه‌تا ساسانی دانا و رازیبوونا لژنا ئه‌كادیمی و زانستی یا زانكۆیا سلێمانیێ ل سه‌ر وه‌رگرتیه هه‌تا وه‌ك په‌رتووكه‌كا زانستی بهێـه خواندن و مفا ژێ بهێته وه‌رگرتن به‌لێ ل پتریا زانكۆیێن فه‌رمی ناهێته خواندن و ره‌نگه گه‌له‌كا هه‌ر ئاگه‌ه ژی لێ نینه، ئانكو زانكۆیان ئاگه‌ه ژ ئێك و دو نینه، شێم بێژم زانكۆ بڤی ره‌نگی نه‌شێن گوهورینێ بكه‌ن، مه‌زناهی یا زانكۆیان دوێ چه‌ندێ دایه سالانه 100 باوه‌رنامێن دكتورایێ بده‌نه بسپوران، یان 100 نامێن زانستی گه‌نگه‌شێ ل سه‌ر بكه‌ن هه‌تا راده‌كی نوكه ناما زانستی ل بازاری دهێته به‌رهه‌م ئینان و كرین و فرۆتن پێ دهێته‌كرن و ئه‌و نه‌بتنێ شاشی یه به‌لكو كاره‌ساته‌كام مه‌زن چونكه ڤه‌كولینێن زانستی و گوهورینێن جڤاكی و سیاسی و ئابوری بوون.
پێشنیارا من ئه‌وه مامۆستایێن بسپور و تایبه‌ت مه ل سه‌ر ئاستێ زانكۆیان كومبوونا ئه‌نجام بده‌ت ژ زاخۆ هه‌تا دگه‌هیته گه‌رمیان و پرۆگرامێن خواندنێ بینه سه‌ر مێزا روینشتنێ و گه‌نگه‌شێ ل گه‌ل ئێك دو بكه‌ن و ئاگه‌هداری كارو بزاڤێن ئێك دو بن و مفا ژ سه‌ربور و چالاكی و هه‌ر كاره‌كێ زانكۆیێ بهێته وه‌رگرتن.
ئه‌ڤ لاوازی یه بۆ ڤێ كابینا حوكمه‌تێ ناڤه‌گه‌ریت به‌لكو مێژوویه‌كا كه‌ڤناره به‌لكو هه‌ر چار سالان وه‌زیره‌ك هاتیه گوهورین و ستاف و سه‌رۆك زانكۆ ژی هاتینه گوهورین و وه‌زیرێ نوو هه‌تا ئاڤاهیێ خوه ژی دگوهورین و ده‌مێ دچیت كاره‌ساتا په‌یدا دكه‌ت و یا ژ هه‌میێ نه‌باشتر پوستێن وه‌زاره‌ت و هه‌می سه‌رۆك زانكۆیێن كوردستانێ حزبی نه ئه‌ڤه ده‌مه‌كی دایه گرنگ بوو باشترین مامۆستایێ زانكۆیێ ببا سه‌رۆكێ زانكۆیێ نه لدوویف پیڤه‌رێ حزبایه‌تیێ با.
