مامۆستایەکا دی یا زمانێ کوردی هاتە سزا دان
رێکخستنا مافێن مرۆڤی یا رۆژهەلاتێ کوردستانێ راگەهاند، سۆما پورمحەمەدی مامۆستایا زمانێ کوردی و ئەنداما دەستەیا رێڤەبەریا رێکخستنا نوژین کو رێکخستنەکا کەلتوری یە، ژ ئالیێ دادگەها ئیرانێ ڤە ل باژێرێ سنە ب ١١ سال سزایێ زیندانێ هاتیە سزا دان و بەری نها زارا محەمەدی ژی ژ بەر چالاکیێن وێ یێن ژ بۆ پێشڤەبرنا زمانێ کوردی هاتبوو سزا دان.
رێکخستنا مافێن مرۆڤی یا رۆژهەلاتێ کوردستانێ ئەو یەک ژی دیار کریە، زۆرداریا ل سەر مامۆستایێن زمانێ کوردی و چالاکڤانێن کورد ل رۆژهەلاتێ کوردستانێ ب رەنگەکێ بەرچاڤ زێدە بوویە، دەستهەلاتا ئیرانێ ب هەموو رەنگەکێ کار دکەت دا نەهێلیت کورد خوەدان ژ زمان و کەلتورێ خوە دەرکەڤن و رۆژانە چالاکڤان دهێنە گرتن و تووشی سزایێن گران دبن، لێ مخابن ل هەمبەر زۆرداریا دەستهەلاتا نها یا ئیرانێ د ئاستێ نێڤدەولەتی دا بێدەنگیەکا مەزن هەیە و یێن رۆژانە بەحسێ مافێن مرۆڤی دکەن ل هەمبەر کریارێن ئیرانێ د بێدەنگن.
