مام چه‌تۆ: حه‌ز ناكه‌م زارۆیێن من كارێ هونه‌ری بكه‌ن
دهۆك، شاكر ئه‌تروشی:
مام چه‌تۆ، ئه‌كته‌ره‌كێ به‌رنیاسێ رۆژئاڤایێ كوردستانێ یه، د دیداره‌كێ دا بۆ رۆژناما ئه‌ڤرۆ دبێژیت: به‌ری ئه‌ز بهێمه دهۆكێ ل رۆژئاڤا بتنێ من كارێ شانۆیێ دكر، لێ پشتی هاتیمه ڤێره پتر ده‌لیڤه بۆ من هات و هه‌تا نوكه من پشكداری د چه‌ند فلم و زنجیره دراما دا كریه، ژوانا من ل گه‌ل ده‌رهێنه‌ر (حسێن حه‌سه‌ن) هه‌روه‌سا (سولین یوسف) كاركریه، هه‌روه‌سا چه‌ند فلم و دراما ل گه‌ل هه‌ردو هونه‌رمه‌ندێن كۆمێدی خه‌لیل قه‌دشی و جه‌لال عه‌بدوللا ژی چێكرینه و دووماهی كارێ من ل گه‌ل ده‌رهێنه‌ر (مانۆ خه‌لیل) بوو كو به‌ری چه‌ند هه‌یڤان مه فلمه‌ك ب ناڤێ (جیران) چێكر و رۆلێ من دوی فلمی دا ئه‌ز مه‌لایێ گوتدی بووم.
هێشتا گۆت: ناڤه‌رۆكا وی فلمی ل دۆر ره‌وشا سوریێ بوو ل سالێن هه‌شتێیان كا چاوا ل وی ده‌می رژێما سوریێ ماموستایێن عه‌ره‌ب دئینانه گوندێن كوردان و قوتابی فێری په‌روه‌ردا به‌عسیان دكرن، ل گه‌ل من هژماره‌كا ئه‌كته‌ران د فلمی دا پشكدارن، ژوانا (مازن ناتۆر، جیهاد عه‌یدۆ، جه‌لال شه‌موت، بوسه‌ینا زاهر، ئه‌حمه‌د زیره‌ك، ل گه‌ل ئه‌كته‌ره‌كا به‌رازیلی) و ژ دهۆكێ ژی (سه‌لاح رێكانی و به‌نگین عه‌لی) بوون، هه‌تا نوكه وی فلمی پشكداری د چه‌ندین فیسته‌ڤالان دا كریه و چه‌ندین خه‌لات و باوه‌رنامه وه‌رگرتینه.
ل دووماهیێ گۆت: پشتی چل و چار سالێن كاركرنێ دوارێ هونه‌ری دا حه‌ز ناكه‌م زارۆیێن من كارێ هونه‌ری بكه‌ن، چنكو ئه‌و ب خوه ره‌وشا مه دبینن كا یا چاوایه؟
ناڤهاتی، ناڤهاتی ل سالا 1962 ل باژێرێ قامیشلۆ ل رۆژهه‌لاتێ كوردستانێ ژ دایكبوویه، ل 1978 هاتیه ناڤ وارێ هونه‌ری و ب شانۆیێ ده‌ستپێكریه و پشكداری د هژماره‌كا زۆرا شانۆگه‌ریان دا كریه، ل سالا 1992 ژیانا هه‌ڤژینیێ ل گه‌ل خانما سترانبێژ (ئیعتدال) پێك ئینایه و ئه‌ڤه چه‌ند ساله ل دهۆكێ دژین.
