مزگینیەکا خوش بۆ حەژێکەرێن وەرزشی ل کوردستانێ و ئورۆپا
ئەڤرۆ نیوز،ھەژار مەعروف:
ل ماوێ بوری ھاتبو راگەھاندن دێ یاریێن یانا دالکورد ل سەر شاشا کەنالێ ڤین تیفی ھێنە ڤەگوھاستن و پشتی دەستپێکرنا یاریێن خولێ و د یاریا حەفتیا ئێکێ دا یاریا وێ نە ھاتیە ڤەگوھاستن ھژمارەکا مەزن یا جەماوەرێ ڤێ یانێ ل کوردستانێ و ئورۆپا دخوازت ئەگەرێن نە ڤەگوھاستنێ بزانن ل دور ڤێ چەندێ کاوە عەبدوللا جنەید سەروکێ فەخری یێ یانا دالکورد یا سویدی کو یانەکا کوردی یە ل خولا پلا ئێک یا سوید دا یا پشکدارە بۆ ئەڤرۆ نیوز گوت: ل حەفتیا بوری مە بزاڤێن مەزن ل گەل وێ کومپانیا ماڤێن ڤەگوھاستنا یاریێن خولا سوید یا پلا ئێک ھەی کرن ژ بوو ب دەستڤە ئینانا یاریێن یانا دالکورد ل سەر شاشا کەنالێ ڤین تیفی لێ ژبەر چەند ئەگەرێن تەکنیکی ئەو نەشیان یاریا ئێکێ ب دەستخوڤە بینن و پشتی ئەو ئاریشەیا تەکنیکی ژی ب دووماھی ھاتی ئەو بۆ جەماوەر و حەژێکەرێن ڤێ یانێ دیاردکەن پشتی یاریێن گەرا دوێ دێ ھەمی یاری ب رەنگەکێ ئێکسەر بۆ جەماوەرێ یانێ ل سەر شاشا کەنالێ ڤین تیفی ب زمانێ کوردی یێ رەسەن ھێنە ڤەگوھاستن و ھەتارادەیەکێ مەزن ژی دبیت یاریا بھێت یا یانا دالکورد ژی ل گەل یانا سیریوس ژ یاریێن حەفتیا دوێ بھێتە ڤەگوھاستن.
ھەژی گوتنێ یە کاوە عەبدوللا جنەید ئێک ژ بازرگانێن بەرنیاسە ل پارێزگەھا دھۆکی کو ل ماوێ بوری ب رێژەیەکا مەزن ئەڤ یانە کوردی کری یە و وەکو سەروکێ فەخری یێ ڤێ یانێ ھاتیە دەستنیشانکرن و د داخویانیەکا خوە یا بەری نوکە دا ژی بۆ ئەڤرۆ نیوز دیارکر بوو بتنێ کرینا ڤێ یانێ ئەوە وەکو پشتەڤانی بۆ ڤێ یانا کوردی ل ئورۆپا کو ب ئالایێ پیروز یێ کوردستانێ پشکداریێ د خولەکا ئورۆپی دا کەت ئەو دخوازن ب وی لوگویێ ئالایێ کوردستانێ پشکداریێ د قارەمانیێن مەزنتر دا بکەن ل ئورۆپا .
