من پڕانییا كەڤالێن خۆ فرۆتینە
زنار تۆڤی
خانما شێوەكار (تارا محەمەد) كو ل باژێرێ مهابادێ ل رۆژهەلاتێ كوردستانێ ژ دایك بوویە و ئەڤە (14) سالن ل باژێرێ سلێمانییێ دژیت، د دیدارەكێ دا گۆت: ل باژێرێ سلیمانییێ گەلەك رێز ل هونەری دهێتە گرتن و هونەری بهایێ خۆ هەیە، بۆ زانین ئەز دەرچوویا كولیژا هونەرێن جوانم، پشكا شێوەكاری، ئەڤە (18) سالن ئەز مژوولی كارێ شێوەكاری مە، هەروەسا بۆ دەمێ حەفت سالان ئەز گرافیك دیزاینەر بووم، هەروەسا چێكرنا وێنەیان ئارامییێ ددەتە دل و دەروونێ من.
ناڤهاتیێ گۆت ژی: من چار پێشانگەهێن هەڤپشك ل ئیرانێ و توركی و سلیمانییێ و فرەنسا و بەغداد ڤەكرینە و ل وەلاتێ توركیا من خەلاتێ باشترین كەڤال وەرگرتییە، هەروەسا من سێ پێشانگەهێن تایبەت ل سلێمانییێ ڤەكرینە و هەتا نوكە پڕانییا كەڤالین خۆ من فرۆتینە، د چێكرنا كەڤالان دا ئەز پتر ل سەر بابەتێ ژنان، روح و هەستان كار دكەم، دیسان نوویاتی و تەكنیكا ئێكسپریشنیزم و هونەرێ ئەبستراكت ژی تێدا هەنە و ل دەمێ دروستكرنا كەڤالان دا ئەز پتر تەكەزییێ ل سەر حالەتێن دەروونی و هەست و هێزێ دكەم، وان هەموویان بۆ بینەران ڤەدگوهێزم، هەروەسا هەكە ئەز پڕانییا دەمێ خۆ بۆ ڤی كاری دانم، ئەز دشێم پتر كەڤالێن خۆ بفرۆشم و ئەز دشێم ژیانا خۆ پێ دابین بكەم، بەلێ نوكە رەوش یا باش نینە و ب تنێ بۆ خۆشیا خۆ و بۆ دانانا پێشانگەهێن نوو كەڤالان دروست دكەم، دیسان نوكە من سەنتەرەكێ پیست و جوانكاریێ هەیە، ل گەل هندێ ئەز ئەنداما سەندیكا هونەرمەندا مە و من چەندین چالاكیێن هونەری هەنە.
