مه‌سرور بارزانى:لێكتێگه‌هشتن دناڤبه‌را هه‌رێمێ و به‌غدا یا هه‌ى بۆ چاره‌سه‌ركرنا كێشان
ئه‌ڤرۆ نیوز:
سه‌رۆكێ حوكمه‌تا هه‌رێما كوردستانێ مه‌سرور بارزانى ئه‌ڤرۆ سێشه‌مبى 3/9/2019 پێشوازى ل محه‌مه‌د حاجى مه‌حموود سكرتێرێ گشتیێ حزبا سوشیالیستا دیموكراتى كوردستان كر.
سكرتێرێ گشتیێ حزبا سوشیالیستا دیموكراتى كوردستانئاماژه ب وێ چه‌ندێ كر كو خه‌لكێ كوردستانێ ئومێد یا ب كابینا نوو یا حوكمه‌تا هه‌رێما هه‌ى و دووپاتكر كو دێ پشته‌ڤانیێ ل گاڤێن حوكمه‌تێ كه‌ن بۆ گه‌شپێدانا ئابوورى ل هه‌رێما كوردستانێ.
ژ لایێ خوه‌ڤه سه‌رۆكێ حوكمه‌تا هه‌رێما كوردستانێ دیاركر كو پێدڤیه حوكمه‌ت بێ جوداهى خزمه‌تا وه‌لاتیێن هه‌رێما كوردستانێ بكه‌ت، د هه‌مان ده‌م دا وه‌لاتى ژى هاریكاریا حوكمه‌تێ بكه‌ن بۆ وێ چه‌ندێ ب باشترین شێوه كارناما خوه بجهبینیت.
مه‌سرور بارزانى هه‌روه‌سا گۆت كو ئیك ژ كارێن به‌راهیێ یێن حوكمه‌تێ گرنگیدانه ب كه‌رتێ چاندنێ و به‌رهه‌مێ ناڤخوه‌یى.
هه‌ر د وێ كۆمبوونێ دا، سه‌رۆكێ حوكمه‌تا هه‌رێمێ رۆناهى خسته سه‌ر دانوستاندنێن هه‌رێما كوردستانێ و به‌غدا و ئاماژه كر كو دانوستاندن د به‌رده‌وامن و پێشكه‌فتن و لێكتێگه‌هشتن یا هه‌ى بۆ چاره‌سه‌ركرنا كێشان ب گۆره‌ى دستوورى.
