مه‌سرور بارزانى: په‌يوه‌نديێن مه ل گه‌ل توركيا گه‌له‌ك د گرنگن
ئه‌ڤرۆ نيوز:
سه‌رۆكێ حوكمه‌تا هه‌رێما كوردستانێ، مه‌سرور بارزانى د كۆنگره‌كێ رۆژنامه‌ڤانى يێ هه‌ڤپشك دا ل گه‌ل وه‌زيرێ ده‌رڤه‌يێ توركيا راگه‌هاند، په‌يوه‌نديێن مه ل گه‌ل توركيا گه‌له‌ك د گرنگن و ئه‌م دژى هه‌بوونا په‌كه‌كێ نه ل شنگالێ و هه‌رێمێ و راگه‌هاند، خوه‌شحالم كو گوهلێدبم توركيا ب هاريكاريا نه‌ته‌وێن ئێگكرتى كارى بۆ زڤراندنا ئاره‌زومه‌ندانه يا ئاواران بۆ جهێن وان دكه‌ت.
مه‌سرور بارزانى گۆت ژى” په‌يوه‌نديێن مه ل گه‌ل توركيا ژ روويێ ديرۆكى و ستراتيژى ڤه د گرنگن، د چارچۆڤێ دانوستاندنێن مه، به‌حس ل گوهۆرينێن ده‌ڤه‌رێ هاته كرن و دهه‌ڤرا بووين كو ئاشتى و سه‌قامگيرى د به‌رژه‌وه‌نديا خه‌لكێ ده‌ڤه‌رێ دايه”.
هه‌روه‌سا گۆت” مه دووپاتى ل وێ چه‌ندێ كر كو پێدڤيه هه‌رێما كوردستانێ و توركيا كارى بۆ پێشڤه‌برنا په‌يوه‌نديان و بازرگانيێ د ناڤبه‌را هه‌ردولا دا بده‌ن”.
سه‌رۆكێ حوكمه‌تا هه‌رێما كوردستانێ دياركر ژى” ئه‌م د دانوستاندنێن ب له‌ز داينه ل گه‌ل به‌غدا، بۆ وێ چه‌ندێ تاكو ل دووماهيێ بگه‌هينه رێككه‌فتنێ و كوردستان ژى دێ بيته ده‌رگه‌هێ ڤه‌كرى ب روويێ عيراقێ دا”.
ل دۆر نيگه‌رانيێن توركيا ژى گۆت” دێ د به‌رده‌وام بين د هاريكاريا دا دژى هه‌ر جۆره تيرۆره‌كا هه‌بيت، پێدڤيه ژ نێزيك هاريكاريا هه‌ڤدو بكه‌ين و بشێين چاره‌سه‌ريان بۆ ببينين”.
سه‌باره‌ت سووريێ ژى، مه‌سرور بارزانى گۆت” مه نيگه‌رانيا هه‌ڤپشك يا هه‌ى، گه‌له‌ك يێ دلخوه‌شم كو دبينم توركيا دخوازيت ل گه‌ل نه‌ته‌وێن ئێگكرتى هاريكاريێ بكه‌ت بۆ ڤه‌گه‌راندنا ئاواران ل دووڤ خواستا وان”.
ل دۆر هه‌بوونا په‌كه‌كێ ل ده‌ڤه‌را شنگالێ، سه‌رۆكێ حوكمه‌تا هه‌رێمێ گۆت” مخابن مه ده‌ستهه‌لات ل شنگالێ نينه، ئه‌و ده‌ڤه‌ره يا ل بن ده‌ستهه‌لاتا هێزێن ئه‌منى يێن عيراقى، ل ده‌مێ بۆرى ئه‌م دژى هه‌بوونا په‌كه‌كێ بووين ل شنگالێ و هه‌رێمێ، ئه‌م د ناكۆكين و ل گه‌ل وێ چه‌ندێ دا نينين په‌كه‌كێ هه‌بوون ل شنگالێ و ده‌ڤه‌رين دى هه‌بيت”.
